ممبئی ، 11 جولائی (ہ س) ۔ ٹی وی سیریل پانڈیا اسٹور سے شہرت حاصل کرنے والے اداکار روہت چندیل کو ممبئی پولیس نے 16 سالہ نابالغ لڑکی کے ساتھ مبینہ چھیڑ چھاڑ، تعاقب کرنے اور مارپیٹ کے الزام میں گرفتار کر لیا ہے۔ متاثرہ لڑکی کی شکایت کی بنیاد پر پولیس نے ملزم کے خلاف پوکسو ایکٹ اور بھارتیہ نیائے سنہتا (بی این ایس) کی متعلقہ دفعات کے تحت مقدمہ درج کیا ہے۔ پولیس کے مطابق روہت چندیل کو 10 جولائی کو دہیسر میں واقع ان کی رہائش گاہ سے گرفتار کیا گیا اور بعد ازاں انہیں خصوصی عدالت میں پیش کیا گیا۔پولیس نے بتایا کہ شکایت کے مطابق روہت چندیل گزشتہ کچھ عرصے سے نابالغ لڑکی کو اس کے ذاتی اور دیگر موبائل نمبروں پر بار بار فون کرکے مبینہ طور پر ہراساں کر رہے تھے۔ الزام ہے کہ 5 جولائی کو وہ متاثرہ لڑکی کے گھر کے قریب پہنچے، جہاں انہوں نے اس کا تعاقب کیا، گالی گلوچ کی اور مبینہ طور پر اس کے ساتھ مارپیٹ بھی کی۔ اس معاملے میں پولیس نے بھارتیہ نیائے سنہتا کی دفعہ 78 (تعاقب کرنا) اور دفعہ 115(2) (جان بوجھ کر جسمانی نقصان پہنچانا) کے علاوہ پوکسو ایکٹ کی متعلقہ دفعات کے تحت مقدمہ درج کیا ہے۔پولیس کا کہنا ہے کہ ابتدائی تحقیقات سے معلوم ہوا ہے کہ ملزم اور متاثرہ لڑکی پہلے سے ایک دوسرے کو جانتے تھے، تاہم ان کے تعلقات کی نوعیت کے بارے میں پولیس نے کوئی سرکاری تفصیل جاری نہیں کی ہے۔ حکام کے مطابق تحقیقات جاری ہیں اور مزید قانونی کارروائی تفتیش کے نتائج کی بنیاد پر کی جائے گی۔ دوسری جانب روہت چندیل یا ان کی ٹیم کی جانب سے اس معاملے پر تاحال کوئی سرکاری ردعمل سامنے نہیں آیا ہے۔روہت چندیل نے اپنے اداکاری کے کریئر کا آغاز 2014 میں ٹی وی شو ہر مشکل کا حل اکبر بیربل سے کیا تھا۔ اس کے بعد انہوں نے کاشی بائی باجی راؤ بلال، پانڈیا اسٹور اور سیراب سمیت متعدد ٹی وی سیریلز میں اداکاری کی۔ پانڈیا اسٹور میں دھول مکوانا کے کردار نے انہیں خاصی شہرت دلائی تھی۔ پولیس نے واضح کیا ہے کہ اس معاملے کی تفتیش جاری ہے اور عدالت میں الزامات ثابت ہونا ابھی باقی ہے۔ہندوستھان سماچار

--------------------

ہندوستان سماچار / جاوید این اے