چنئی، 10 جولائی (ہ س)۔

تمل ناڈو حکومت نے ریاست میں جائیداد رجسٹریشن کے عمل کو مکمل طور پر ڈجیٹل بنانے کی سمت میں بڑا قدم اٹھاتے ہوئے کہیں بھی رجسٹریشن( اینی وے رجسٹریشن )آن لائن سسٹم کو نافذ کرنے کا فیصلہ کیا ہے ۔ نیا نظام 17 اگست 2026 سے نافذ العمل ہوگا۔ ایک بار لاگو ہونے کے بعد، شہری ریاست میں کہیں سے بھی جائیداد کے رجسٹریشن کے عمل کو آن لائن مکمل کر سکیں گے، جس سے مخصوص سب رجسٹرار آفس جانے کی ضرورت ختم ہو جائے گی۔

یہ فیصلہ ریاستی تجارتی ٹیکس اور رجسٹریشن کے وزیر ڈی لوگیش تمل سیلوان کی زیر صدارت محکمہ جاتی جائزہ اجلاس میں کیا گیا۔ اجلاس میں نئے نظام کے تکنیکی، انتظامی اور قانونی پہلوو¿ں کا جائزہ لیا گیا اور اس کے نفاذ کی تیاریوں کا جائزہ لیا گیا۔

نئے نظام کے تحت درخواست دہندگان 24 گھنٹے آن لائن دستاویزات اپ لوڈ کر سکیں گے۔ دستاویزات کی تصدیق، رجسٹریشن فیس کی ادائیگی، اور دیگر ضروری رسمی کارروائیاں ڈیجیٹل طور پر مکمل کی جائیں گی۔ رجسٹریشن کے پورے عمل کی صورتحال کو بھی آن لائن مانیٹر کیا جائے گا۔

حکومت نے واضح کیا کہ یہ سہولت ابتدائی طور پر صرف پلاٹ کی پہلی فروخت اور نئے فلیٹ کی پہلی فروخت پر لاگو ہوگی۔ بعد میں، تجربے اور ضروریات کی بنیاد پر، اسے دیگر اقسام کی جائیداد کے لین دین تک بڑھایا جا سکتا ہے۔

نئے سسٹم کے لیے صارفین کو لاگ ان آئی ڈی فراہم کی جائے گی۔ اس سے وہ دستاویزات کو اپ لوڈ کرنے، بائیو میٹرک تصدیق سے گزرنے، آن لائن فیس ادا کرنے اور رجسٹریشن مکمل ہونے کے بعد ڈیجیٹل دستاویزات کو ڈاو¿ن لوڈ کرنے کی اجازت دے گا۔ حکومت کے مطابق ڈیجیٹل طور پر جاری کردہ دستاویزات کو قانونی طور پر تسلیم کیا جائے گا۔

جائزہ میٹنگ میں وزیر ڈی لوگیش تمل سیلو ن نے کہا کہ ریاستی حکومت رجسٹریشن ڈیپارٹمنٹ میں ٹیکنالوجی پر مبنی اصلاحات پر مسلسل کام کر رہی ہے۔ انہوں نے عہدیداروں کو ہدایت دی کہ وہ شہریوں کی شکایات کے فوری ازالے کو یقینی بنائیں اور جہاں تک ممکن ہو اسی دن رجسٹریشن دستاویزات دستیاب کرائیں۔

حکومت کا کہنا ہے کہ نئے نظام کے نفاذ کے بعد رجسٹریشن دفاتر میں رش کم ہو گا، مختلف دفاتر میں کام کے بوجھ کی بہتر تقسیم ممکن ہو سکے گی اور زیر التوا مقدمات کو نمٹانے میں بھی تیزی آئے گی۔

ہندوستھان سماچار

ہندوستان سماچار / عطاءاللہ