شملہ، 10 جولائی (ہ س)۔ ہماچل پردیش میں مانسون کے 30 جون کو پہنچنے کے بعد پہلی بار بڑے پیمانے پر شدید بارش درج کی گئی ہے۔ کل رات سے ریاست کے کئی حصوں میں موسلادھار بارش ہوئی ہے، جس کا سب سے زیادہ اثر شملہ، سرمور اور سولن اضلاع میں پڑا ہے۔

محکمہ موسمیات کے مطابق گزشتہ 24 گھنٹوں کے دوران ضلع سرمور کے پچھاد میں 207 ملی میٹر بارش ریکارڈ کی گئی جو کہ اس مانسون سیزن میں اب تک کی سب سے زیادہ بارش ہے۔ اس کے علاوہ، ناہن میں 158 ملی میٹر، سولن ضلع کے کسولی میں 145 ملی میٹر، دھرم پور میں 136 ملی میٹر، سولن میں 113 ملی میٹر اور کانگڑا ضلع کے پالم پور میں 109 ملی میٹر بارش ریکارڈ کی گئی۔ چمبہ ضلع کے جوت میں 83 ملی میٹر، شملہ ضلع کے جبڑہٹی میں 72 ملی میٹر، کفری اور ضلع اونا کے بھروائن میں 62-62 ملی میٹر، بلاس پور ضلع کے گھاگھس میں 62 ملی میٹر، شملہ کے شیلارو میں 60 ملی میٹر اور بلاس پور کے کاہو میں 56 ملی میٹر بارش ریکارڈ کی گئی۔

بارش کی وجہ سے لینڈ سلائیڈنگ سے شملہ ضلع میں 27 سڑکیں بند ہوگئیں۔ بجلی کے 67 ٹرانسفارمر ٹھپ ہونے سے کئی علاقوں میں بجلی کی فراہمی متاثر ہوئی، پینے کے پانی کی 53 اسکیمیں بھی متاثر ہوئی ہیں۔

شملہ ضلع میں سب سے زیادہ اثر ٹھیوگ اور رام پور سب ڈویزن میں ریکارڈ کیا گیا۔ ٹھیوگ اور رامپور میں چھ سڑکیں، جبل اور چوپال میں پانچ، پانچ، سنی میں تین اور کوٹکھائی اور کمارسین میں ایک ایک سڑکیں بند ہیں۔ بجلی کی فراہمی بھی متاثر ہوئی ہے۔ رام پور میں 49، چوپال میں 10 اور ٹھیوگ میں آٹھ ٹرانسفارمر خراب ہیں۔ پینے کے پانی کی فراہمی بھی متاثر ہوئی ہے۔ پینے کے پانی کی 29 اسکیمیں ٹھیوگ میں، 15 رام پور میں، پانچ چوپال میں اور چار کمارسین میں متاثر ہوئی ہیں۔

مسلسل بارش کے پیش نظر جمعہ کو سرمور اور سولن اضلاع میں تمام سرکاری اور نجی اسکولوں، کالجوں اور دیگر تعلیمی اداروں میں تعطیل کا اعلان کیا گیا تھا۔ سولن کے ڈپٹی کمشنر منموہن شرما اور سرمور کی ڈپٹی کمشنر پرینکا ورما نے خراب موسم اور حفاظتی خدشات کا حوالہ دیتے ہوئے یہ احکامات جاری کیے۔ سرمور ضلع میں تقریباً 24 گھنٹوں سے مسلسل تیز بارش ہو رہی ہے۔

ضلع انتظامیہ کے مطابق، چار درجن سے زائد سڑکیں بند ہو گئی ہیں جس سے کئی علاقوں کا رابطہ منقطع ہے۔ گری ندی میں اضافے کے بعد گری جاٹون ڈیم کے تمام 10 دروازے کھول کر پانی چھوڑا گیا۔ اس کے بعد نشیبی علاقوں کے مکینوں کو محتاط رہنے کا مشورہ دیا گیا ہے۔ انتظامیہ نے شہریوں سے اپیل کی ہے کہ وہ دریاؤں اور ندی نالوں سے دور رہیں اور غیر ضروری سفر سے گریز کریں۔ کئی مقامات پر لینڈ سلائیڈنگ کا بھی خطرہ ہے۔

مسلسل بارش کے اثرات منڈی میں بھی محسوس کیے گئے۔ منڈی-منالی قومی شاہراہ پر ہنوگی بازار سے پہلے ایک پہاڑی سے ایک بڑی چٹان اور ملبہ گرنے کے بعد حفاظتی وجوہات کی بنا پر بھاری گاڑیوں کی نقل و حرکت روک دی گئی۔ چھوٹی گاڑیوں کو پولیس کی نگرانی میں احتیاط کے ساتھ منتقل کیا جا رہا ہے۔ دارالحکومت شملہ کے وکاس نگر علاقے میں ایک عمارت کی سامنے کی دیوار گرنے سے سڑک کے کنارے کھڑی دو گاڑیوں کو نقصان پہنچا۔ اس واقعے میں کوئی جانی نقصان نہیں ہوا۔

محکمہ موسمیات نے 15 جولائی تک ریاست کے کئی حصوں میں شدید بارش کے لیے ایلو الرٹ جاری کیا ہے۔ محکمہ کے مطابق 16 جولائی کو بھی موسم خراب رہنے کا امکان ہے، حالانکہ اس دن کے لیے کوئی الرٹ جاری نہیں کیا گیا ہے۔ مسلسل بارش اور لینڈ سلائیڈنگ کے امکان کے پیش نظر لوگوں کو دریاو¿ں اور ندی نالوں سے دور رہنے، غیر ضروری سفر سے گریز کرنے اور سفر کرنے سے پہلے سڑک کی تازہ ترین صورتحال کو چیک کرنے کی تاکید کی گئی ہے۔

ہندوستھان سماچار

ہندوستان سماچار / محمد شہزاد