واشنگٹن،07جون(ہ س)۔ایک باخبر ذریعے کا کہنا ہے کہ امریکہ اپنے خلیجی اتحادیوں کو ایران کے منجمد اثاثے فراہم کرے گا تاکہ مستقبل میں ایران کی جانب سے پہنچائے جانے والے کسی بھی نقصان کی تلافی اور تعمیر نو میں مدد کی جا سکے۔ذرائع نے مزید بتایا کہ امریکہ ان اثاثوں کو سابقہ نقصانات کے ازالے کے لیے استعمال کرنے پر بھی غور کرے گا۔ خبر رساں ادارے رایئٹرز کے مطابق امریکی وزیر خزانہ سکاٹ بیسنٹ نے ایک ٹیم کو ہدایت کی ہے کہ وہ ان نقصانات کا تخمینہ لگائے جو ایران پہلے ہی واشنگٹن کے خلیجی اتحادیوں کو پہنچا چکا ہے۔

یہ پیش رفت ایسے وقت میں ہوئی ہے جب کویت اور بحرین پر ایرانی حملوں کا اعادہ ہوا ہے۔ ان حملوں میں امریکی اڈوں کو نشانہ بنانے کا دعویٰ کیا گیا ہے حالانکہ گزشتہ چند دنوں کے دوران واشنگٹن اور تہران کے درمیان مذاکرات میں محتاط پیش رفت کے اشارے ملے تھے۔کشیدگی اس وقت دوبارہ بڑھ گئی جب امریکی فوج نے جمعہ کے روز جنوبی ایران میں ریڈار نگرانی کے مقامات کو نشانہ بنانے کا اعلان کیا۔ یہ کارروائی ایران کے 4 ڈرونز کو گرانے کے بعد کی گئی جن کے بارے میں امریکہ کا کہنا تھا کہ وہ آبنائے ہرمز میں شہری بحری جہاز رانی کے لیے خطرہ بنے ہوئے تھے۔اس کے بعد کویت اور بحرین دونوں میں سائرن بج اٹھے اور دونوں ممالک میں دھماکوں کی آوازیں سنی گئیں۔

اسی اثنا میں ایرانی پاسداران انقلاب نے اعلان کیا کہ اس نے سیرک اور قشم جزیروں پر امریکی جارحیت کے جواب میں خطے میں دشمن کے اڈوں کو میزائلوں سے نشانہ بنایا ہے۔ امریکی سینٹرل کمانڈ (سینٹ کام) نے اطلاع دی ہے کہ ایران نے کویت اور بحرین کی جانب 7 بیلسٹک میزائل داغے ہیں۔ کمانڈ نے نشاندہی کی کہ فضائی دفاعی نظام نے ان میں سے 6 کو مار گرایا جبکہ ساتواں میزائل اپنے ہدف تک نہیں پہنچ سکا۔ مزید کہا گیا کہ فی الحال امریکی فوجیوں کے زخمی ہونے کی کوئی اطلاع نہیں ہے اور بحرین میں امریکی پانچویں فلیٹ کے ہیڈکوارٹر کو نقصان پہنچنے کے ایرانی دعوے جھوٹے ہیں۔امریکی صدر ڈونلڈ ٹرمپ نے جمعہ کے روز اس یقین کا اظہار کیا کہ ایرانی فریق کے ساتھ مذاکرات کامیابی سے جاری ہیں۔ انہوں نے اس بات کا اعادہ کیا کہ تہران کبھی بھی جوہری ہتھیار حاصل نہیں کر سکے گا۔ انہوں نے صحافیوں کے سوالات کے جواب میں کہا کہ ہم ایران کے ساتھ بڑی پیش رفت کر رہے ہیں۔ وہ جوہری ہتھیار نہیں رکھیں گے اور وہ اس پوزیشن میں نہیں ہیں کہ انہیں حاصل کر سکیں۔دوسری جانب پاکستان دونوں ممالک کے درمیان نقطہ نظر کو قریب لانے اور جنگ کے خاتمے کے لیے ابتدائی معاہدے تک پہنچنے کی راہ میں حائل رکاوٹوں کو دور کرنے کی کوششیں جاری رکھے ہوئے ہے۔ تاہم باخبر ذرائع نے بتایا ہے کہ بنیادی مسئلہ ابھی بھی جوہری فائل سے الگ ہے اور وہ بیرون ملک منجمد ایرانی رقوم پر پابندیاں ہٹانے کا طریقہ کار ہے۔

ہندوستھان سماچار

ہندوستان سماچار / Mohammad Khan