خواتین کی ٹیم کا مقابلہ چین سے ہوگا جبکہ مردوں کی ٹیم کا مقابلہ پاکستان سے ہوگا

کاکامیگہارا (جاپان)، 4 جون (ہ س)۔ ہندوستانی انڈر 18 خواتین اور مردوں کی ہاکی ٹیمیں انڈر 18 ایشیا کپ 2026 کے سیمی فائنل کے لیے پوری طرح تیار ہیں۔ دونوں ٹیموں نے پول مرحلے میں شاندار کارکردگی کا مظاہرہ کرتے ہوئے آخری چار میں جگہ بنا لی ہے۔

خواتین کی ٹیم ناقابل شکست سیمی فائنل میں داخل ہوگئی۔ ہندوستانی انڈر 18 خواتین کی ٹیم نے اپنے تینوں میچ جیت کر پول اے میں سرفہرست مقام حاصل کیا۔

ہندوستان نے اپنی مہم کا آغاز ملائیشیا پر 1-2 سے سخت جیت کے ساتھ کیا، پھر کوریا کو 1-3 سے شکست دی اور پھر فائنل میں سنگاپور کو 0-25 سے زبردست شکست دیکرسیمی فائنل تک رسائی حاصل کی۔

نوشین ناز ہندوستانی ٹیم کے لیے اب تک 10 گول کے ساتھ سب سے کامیاب گول اسکورر رہی ہیں۔ گیتا شری نمی نے 5، کپتان سویٹی کجور نے 4 اور پرینکا منز نے 3 گول اسکور کیے ہیں۔

اب ہندوستان کا مقابلہ چین سے ہوگا جو پول بی میں دو جیت اور ایک ڈرا کے ساتھ دوسرے نمبر پر ہے۔ یہ میچ 5 جون کو صبح ساڑھے9 بجے (آئی ایس ٹی) کھیلا جائے گا۔

خواتین کی ٹیم کی ہیڈ کوچ رانی نے کہا، یہ اب تک کا شاندار سفر رہا ہے۔ یہ ان کھلاڑیوں کا پہلا بین الاقوامی ٹورنامنٹ ہے اور انہوں نے غیر معمولی کارکردگی کا مظاہرہ کیا ہے۔ اب ہماری توجہ چین کے خلاف سیمی فائنل پر ہے۔ ہم اپنی ہاکی کھیلنا چاہتے ہیں، جارحانہ ہونا چاہتے ہیں اور ہمیں ملنے والے مواقع کوگول میں تبدیل کرنا چاہتے ہیں۔

انہوں نے کہا کہ ٹیم فٹ ہے اور ہر گیند کا مقابلہ کرنے کے لیے تیار ہے۔

ہندوستانی انڈر 18 مردوں کی ہاکی ٹیم پول اے میں تین جیت اور ایک ہار کے ساتھ دوسرے نمبر پر رہی۔ ٹیم نے 32 گول کیے ہیں اور صرف چھ گول کھائے ہیں۔

ہندوستان نے اپنے پہلے میچ میں قازقستان کو 0-13 سے شکست دی، لیکن دوسرے میں میزبان جاپان سے 4-2 سے ہار گئی۔ اس کے بعد ٹیم نے شاندار واپسی کرتے ہوئے کوریا کو 1-4 اور چائنیز تائپے کو 1-13 سے شکست دے کر سیمی فائنل تک رسائی حاصل کی۔

ہندوستانی کپتان کیتن کشواہا اب تک سات گول کر چکے ہیں، جبکہ آشیش تانی پورتی نے چھ گول کیے ہیں۔ غازی خان اور شاہ رخ علی نے تین تین گول کیے ہیں۔

اب بھارت کا مقابلہ پاکستان سے سیمی فائنل 2 میں 5 جون کو ساڑھے3 بجے آئی ایس ٹی پی ایم پر ہوگا۔ پاکستان پول بی میں سرفہرست ہے۔

مردوں کی ٹیم کے کوچ سردار سنگھ نے کہا، چار میچوں کے بعد، ہم نے ان شعبوں کی نشاندہی کی ہے جن میں بہتری کی ضرورت ہے، خاص طور پر پنالٹی کارنر حملے اور دفاع۔ کھلاڑی اب جدید ہاکی کے تقاضوں کو سمجھ چکے ہیں اور ٹیم میں ہم آہنگی ہماری سب سے بڑی طاقت ہے۔

میچ کا شیڈول: ہندوستانی خواتین ٹیم بمقابلہ چین - 5 جون صبح ساڑھے9 بجے (آئی ایس ٹی)

ہندوستانی مردوں کی ٹیم بمقابلہ پاکستان - 5 جون، ساڑھے3 بجے آئی ایس ٹی پی ایم

---------------

ہندوستان سماچار / عبدالسلام صدیقی