فرنچ اوپن میں کوبولی کا کمال، پہلی بار گرینڈ سلیم سیمی فائنل میں پہنچے

پیرس، 4 جون (ہ س)۔ نوجوان اطالوی ٹینس کھلاڑی فلیویو کوبولی نے فرنچ اوپن 2026 میں شاندار کارکردگی کا مظاہرہ کرتے ہوئے اپنے کریئر کا پہلا گرینڈ سلیم سیمی فائنل حاصل کر لیا ہے۔ رولاں گیرو میں کھیلے گئے مردوں کے سنگلز کوارٹر فائنل مقابلے میں انہوں نے کینیڈا کے چوتھی سیڈ فیلکس آگر-الیاسیمے کو چار سیٹوں میں 6-4، 4-6، 4-6، 4-6 سے ہرایا۔

24 سالہ کوبولی نے پہلا سیٹ ہارنے کے بعد جاندار واپسی کی اور لگاتار تین سیٹ جیت کر مقابلہ اپنے نام کر لیا۔ یہ ان کے کریئر کا اب تک کا سب سے بڑا گرینڈ سلیم نتیجہ ہے۔ جیت کے بعد انہوں نے کہا کہ یہ ہفتہ ان کی زندگی کا سب سے یادگار ہفتہ بن گیا ہے۔ مقابلے کی شروعات میں تیز ہوا کی وجہ سے دونوں کھلاڑیوں کو مشکل حالات کا سامنا کرنا پڑا۔ پہلا سیٹ ہارنے کے بعد کورٹ کی چھت بند کیے جانے کے ساتھ ہی کوبولی نے اپنی تال دوبارہ حاصل کر لی۔ انہوں نے جارحانہ فور ہینڈ اور بہترین فٹ ورک کے دم پر میچ کا رخ پلٹ دیا۔

اس جیت کے ساتھ کوبولی نے پہلی بار کسی گرینڈ سلیم میں ٹاپ-10 رینکنگ والے کھلاڑی کو ہرانے کا کارنامہ بھی انجام دیا۔ لائیو اے ٹی پی رینکنگ میں وہ 14ویں نمبر سے چھلانگ لگا کر 10ویں نمبر پر پہنچ گئے ہیں، جو ان کے کریئر کی بہترین رینکنگ ہے۔ سیمی فائنل میں اب ان کا مقابلہ اٹلی کے ہی میٹیو بیریٹینی اور میٹیو ارنالڈی کے درمیان ہونے والے کوارٹر فائنل کے فاتح سے ہوگا۔ اس سے یہ طے ہو گیا ہے کہ مردوں کے سنگلز زمرے کے فائنل میں ایک اطالوی کھلاڑی ضرور پہنچے گا۔

کوبولی کی اس کامیابی نے اٹلی کی ٹینس تاریخ میں نیا باب جوڑ دیا ہے۔ یہ تیسرا موقع ہے جب کسی گرینڈ سلیم کے مردوں کے زمرے میں دو اطالوی کھلاڑی سیمی فائنل تک پہنچے ہیں۔ ساتھ ہی، پہلی بار کسی گرینڈ سلیم میں پوری طرح اطالوی مردوں کا سیمی فائنل یقینی ہوا ہے۔ واضح رہے کہ فرنچ اوپن مردوں کا سنگلز خطاب جیتنے والے آخری اطالوی کھلاڑی ایڈریانو پناٹا تھے، جنہوں نے 1976 میں یہ کامیابی حاصل کی تھی۔ اب کوبولی کے پاس تقریباً پانچ دہائیوں بعد اٹلی کو پھر سے رولاں گیرو کا چیمپئن بنانے کا موقع ہے۔

ہندوستھان سماچار

---------------

ہندوستان سماچار / انظر حسن