ٹوکیو، 30 جون (ہ س)۔ جاپان کی وزیر اعظم سنائے تاکائیچی یکم جولائی سے ہندوستان کے تین روزہ دورے پر ہوں گی۔ وہ ہندوستان میں اپنے ہم منصب نریندر مودی سے ملاقات کریں گی۔ جاپان کی حکومت نے کہا کہ اس دورے کا مقصد اقتصادی ترقی کے لیے تعاون کو مزید وسعت دینا ہے۔ جاپانی حکومت کے ایک اعلیٰ عہدیدار نے بتایا کہ دونوں ممالک نئی دہلی میں اقتصادی سلامتی پر مشترکہ اعلامیہ جاری کر سکتے ہیں۔ اس میں اقتصادی دباؤ کی مخالفت کا ذکر ہونے کا امکان ہے۔

جاپان ٹوڈے کی رپورٹ کے مطابق، توقع ہے کہ دونوں ممالک پانچ ترجیحی شعبوں میں تعاون کو مزید مضبوط کرنے پر اتفاق کریں گے، جن میں سیمی کنڈکٹرز، ریئر ارتھ جیسی اہم معدنیات، معلومات اور مواصلاتی ٹیکنالوجی اور ماحول دوست توانائی اور طبی سامان شامل ہیں۔ گزشتہ سال اکتوبر میں عہدہ سنبھالنے کے بعد وزیر اعظم سانائے تاکائیچی کے دورہ ہندوستان کا اعلان کرتے ہوئے، چیف کابینہ سکریٹری منورو کیہارا نے کہا کہ جاپان کا مقصد اقتصادی سلامتی، سرمایہ کاری اور اختراع کے شعبوں میں تعاون کو مضبوط کرکے ”ہندوستان کے ساتھ اپنے اسٹریٹجک تعلقات کو مزید توسیع دینا“ ہے۔

اعلیٰ حکومتی ترجمان نے ایک پریس کانفرنس میں کہا کہ آزاد اور کھلے ہند-بحرالکاہل کے ہدف کو حاصل کرنے کے لیے جاپان اور ہندوستان کے لیے تعلقات کو مضبوط بنانا بہت ضروری ہے۔ یہ دورہ ایک ایسے وقت میں ہو رہا ہے جب جاپان اور چین کے تعلقات کشیدہ ہیں۔ گزشتہ سال نومبر میں، تاکائیچی نے پارلیمنٹ کو بتایا کہ تائیوان (ایک خود مختار جزیرے جس کا دعوی بیجنگ نے کیا ہے) پر حملے کی صورت میں جاپان کی دفاعی افواج، امریکی حمایت کے ساتھ جوابی کارروائی کر سکتی ہیں۔

ہمالیہ کے سرحدی علاقے میں چین کے ساتھ ہندوستان کا دیرینہ علاقائی تنازع ہے۔ حال ہی میں، امریکی صدر ڈونلڈ ٹرمپ کی اعلیٰ ٹیرف پالیسیوں کے درمیان، ہندوستان نے اپنے اقتصادی تعلقات کی بنیاد پر چین کے ساتھ تعلقات کو بہتر بنانے کی کوشش کی ہے۔

ہندوستھان سماچار

ہندوستان سماچار / محمد شہزاد