جموں, 29 جون (ہ س) آل ڈیلی ویجرز جموں و کشمیر سنگھرش سمیتی نے جموں و کشمیر کے تمام یومیہ اجرت پر کام کرنے والے ملازمین کے لیے کم از کم اجرت قانون (منیمم ویجز ایکٹ) کے فوری نفاذ اور تمام اہل کارکنوں کی مستقلی کا مطالبہ کیا ہے۔سمیتی کے جے کے یو ٹی صدر سنی کانت چب کی جانب سے جاری ایک پریس بیان میں کہا گیا کہ تنظیم آشا ورکرز، مڈ ڈے میل کُکس، لینڈ ڈونرز، سی پی ڈبلیو ورکرز، مالی کم چوکیدار، آنگن واڑی ورکرز، وی ڈی جی ورکرز، ایس بی ایم ورکرز، صفائی کرمچاری، پی ایچ ای آئی ٹی آئی ورکرز، بغیر تنخواہ کام کرنے والے ملازمین، آن لائن ورکرز سمیت مختلف زمروں کے ہزاروں یومیہ اجرت کارکنوں کی نمائندگی کرتی ہے۔

بیان میں کہا گیا کہ حکومت فوری طور پر تمام ڈیلی ویجرز پر منیمم ویجز ایکٹ نافذ کرے، تمام اہل ملازمین کو مستقل کیا جائے اور انہیں مناسب اجرت، باوقار روزگار اور سماجی تحفظ فراہم کیا جائے۔سمیتی نے کہا کہ حکومت کی جانب سے متعدد بار یقین دہانیاں کرائی گئیں، لیکن اب تک ان مطالبات پر عمل درآمد نہیں کیا گیا، جس کے باعث ہزاروں مزدور خاندان کم اجرت اور ملازمت کے عدم تحفظ کا سامنا کر رہے ہیں۔سمیتی نے متنبہ کیا کہ اگر حکومت نے ان دیرینہ مطالبات کو جلد پورا نہ کیا تو جموں و کشمیر بھر میں جمہوری انداز میں جاری تحریک کو مزید تیز کیا جائے گا۔ بیان میں کہا گیا کہ کارکن اپنے اہل خانہ کے ساتھ پرامن احتجاج جاری رکھیں گے، جب تک ان کے جائز مطالبات تسلیم نہیں کیے جاتے۔سمیتی نے حکومت سے اپیل کی کہ وہ ہزاروں محنت کش ملازمین اور ان کے خاندانوں کے مفاد میں فوری اور ٹھوس اقدامات کرے۔

ہندوستھان سماچار

---------------

ہندوستان سماچار / محمد اصغر