جموں, 29 جون (ہ س)۔

سالانہ امرناتھ یاترا کے پیش نظر جموں ریلوے اسٹیشن اور اس کے اطراف سیکورٹی مزید سخت کر دی گئی ہے۔ گورنمنٹ ریلوے پولیس (جی آر پی) نے پیر کو خصوصی تلاشی مہم کے دوران 14 مشتبہ افراد کو حراست میں لے لیا۔پولیس حکام کے مطابق مشتبہ افراد اسٹیشن پر بلا مقصد گھومتے ہوئے پائے گئے اور پوچھ گچھ کے دوران اپنی موجودگی کی کوئی تسلی بخش وجہ پیش نہ کر سکے، جس پر انہیں مزید جانچ کے لیے حراست میں لیا گیا۔ ابتدائی تحقیقات کے بعد پانچ افراد کے خلاف بی این ایس ایس کی متعلقہ احتیاطی دفعات کے تحت مقدمات درج کیے گئے ہیں۔

تمام زیر حراست افراد کو ایگزیکٹو مجسٹریٹ فرسٹ کلاس، راکھ باہو، جموں کی عدالت میں پیش کیا گیا، جبکہ پولیس ان کی شناخت، پس منظر اور ممکنہ مجرمانہ روابط کی بھی جانچ کر رہی ہے۔

جی آر پی کے سینئر حکام نے بتایا کہ امرناتھ یاترا کے دوران یاتریوں کی حفاظت اولین ترجیح ہے۔ اسی مقصد کے تحت جموں ریلوے اسٹیشن، پلیٹ فارمز اور اطراف کے علاقوں میں چوبیس گھنٹے نگرانی کی جا رہی ہے، جبکہ سادہ لباس میں بھی پولیس اہلکار تعینات کیے گئے ہیں۔پولیس کے مطابق یاترا کے دوران سی سی ٹی وی کیمروں، ڈاگ اسکواڈ، سامان کی تلاشی اور اچانک سرچ آپریشنز کے ذریعے سیکورٹی انتظامات کو مزید مؤثر بنایا گیا ہے۔ عوام سے بھی اپیل کی گئی ہے کہ کسی بھی مشتبہ شخص یا لاوارث شے کی اطلاع فوری طور پر پولیس کو دیں۔حکام کا کہنا ہے کہ جموں ریلوے اسٹیشن امرناتھ یاترا کا اہم داخلی مرکز ہے، جہاں سے روزانہ ہزاروں یاتری بیس کیمپ کی جانب روانہ ہوتے ہیں، اسی لیے یہاں سیکورٹی کے فول پروف انتظامات کیے گئے ہیں۔

ہندوستھان سماچار

---------------

ہندوستان سماچار / محمد اصغر