امرناتھ یاترا کے پُرامن انعقاد کے جموں-سرینگر قومی شاہراہ پر یاترا قافلے کی ڈرائی رن کی گئی

جموں، 29 جون (ہ س)۔ سالانہ امرناتھ یاترا کے پرامن اور محفوظ انعقاد کو یقینی بنانے کے لیے پیر کی صبح جموں-سرینگر قومی شاہراہ پر یاترا قافلے کی ڈرائی رن (مشق) کی گئی، جس کے دوران سیکورٹی، ٹریفک، لاجسٹکس اور مختلف محکموں کے درمیان تال میل کا جائزہ لیا گیا۔ ڈویژنل کمشنر جموں رمیش کمار اور انسپکٹر جنرل آف پولیس جموں بھیم سین توتی نے صبح پانچ بجے بھگوتی نگر یاترا بیس کیمپ سے قافلے کو روانہ کیا۔ دونوں اعلیٰ افسران خود بھی ایک بس میں سوار ہوئے اور راستے میں یاتریوں کے لیے کیے گئے انتظامات کا موقع پر معائنہ کیا۔

سخت سیکورٹی میں قافلہ تقریباً چار گھنٹوں میں رام بن پہنچا، جہاں چندرکوٹ یاترا لنگر پر یاتریوں کے لیے فراہم کی گئی سہولیات اور دیگر انتظامات کا جائزہ لیا گیا۔ بعد ازاں قافلہ بانہال کے راستے پہلگام اور بالتل بیس کیمپوں کی جانب روانہ ہوگیا۔حکام کے مطابق ڈرائی رن کا مقصد یاترا کے دوران قافلوں کی نقل و حرکت، سیکورٹی انتظامات، لاجسٹکس اور مختلف ایجنسیوں کے درمیان رابطہ کاری کو جانچنا تھا تاکہ 3 جولائی سے شروع ہونے والی 57 روزہ امرناتھ یاترا کے دوران کسی قسم کی دشواری پیش نہ آئے۔ٹریفک حکام نے بتایا کہ یاترا قافلے کے قاضی گنڈ سے گزرنے کے بعد ہی جموں-سرینگر قومی شاہراہ پر عام شہریوں کی آمدورفت بحال کی جائے گی۔

ہندوستھان سماچار

---------------

ہندوستان سماچار / محمد اصغر