کولکاتہ، 26 جون (ہ س)۔

رام مندر ٹرسٹ کے جنرل سکریٹری کے عہدے سے چمپت رائے کے استعفیٰ کے بعد ایودھیا میں 1990کے فائرنگ کیس میں مارے گئے رام کمار کوٹھاری اور شرد کوٹھاری کی بہن پورنیما کوٹھاری، نے کہا کہ چمپت رائے نے اپنی اخلاقی ذمہ داری قبول کی اور یہ فیصلہ کیا۔ رام مندر تحریک میں چمپت رائے کے تعاون کی تعریف کرتے ہوئے، انہوں نے ان کے خلاف الزامات پر بھی سوال اٹھایا۔

پورنیما کوٹھاری نے کہا، شاید انہوں نے اپنی اندرونی آواز کے بعد اور اخلاقی ذمہ داری قبول کرتے ہوئے استعفیٰ دیا، کیونکہ وہ ٹرسٹ میں بہت اہم عہدے پر فائز تھے۔

انہوں نے وضاحت کی کہ وہ چمپت رائے کو پچھلے 15 سالوں سے جانتی ہیں اور جب بھی وہ ایودھیا جاتی ہیں تو ان سے ملتی ہیں۔ ان کے مطابق، انہوں نے اپنی پوری زندگی رام مندر کے لیے وقف کردی۔ انہوںنے عدالتی کیس کو بھی سنبھالا اور بھگوان رام کے وجود پر سوال اٹھانے والوں کے خلاف لڑتے ہوئے، مندر کی تعمیر میں کلیدی کردار ادا کیا۔

پورنیما کوٹھاری نے کہا کہ وہ ایسے شخص پر لگائے گئے الزامات سے تکلیف محسوس کرتی ہیں۔ انہوں نے کہا، میں نے ان کی لگن اور جدوجہد کو قریب سے دیکھا ہے۔ انہوں نے ایک مقدس زندگی گزاری ہے۔ انہوںنے جتنی بھی جدوجہد برداشت کی ہے، اس کے بعد ان کے لیے پیسے کی کوئی اہمیت نہیں ہے۔ اس لیے ان پر ایسے الزامات نہیں لگائے جانے چاہئیں۔

ہندوستھان سماچار

ہندوستان سماچار / عطاءاللہ