جموں, 26 جون (ہ س)۔

شمالی ریلوے کے جموں ڈویژن نے بانہال اور قاضی گنڈ کے درمیان 17 کلومیٹر طویل برقی سنگل لائن ریلوے سیکشن پر ٹرینوں کی زیادہ سے زیادہ رفتار 75 کلومیٹر فی گھنٹہ سے بڑھا کر 100 کلومیٹر فی گھنٹہ کرنے کی منظوری دے دی ہے۔ریلوے حکام نے بتایا کہ اس فیصلے سے بانہال، قاضی گنڈ، اننت ناگ اور سری نگر کے درمیان سفر کا وقت کم ہوگا، ٹرینوں کی وقت کی پابندی میں بہتری آئے گی اور مسافروں کو زیادہ آرام دہ سفری سہولت میسر آئے گی۔

حکام کے مطابق رفتار میں اضافے سے ریلوے سیکشن کی آپریشنل صلاحیت میں بھی اضافہ ہوگا، ٹریک کی دیکھ بھال کے لیے بہتر وقت دستیاب ہوگا اور ٹرینوں کی آمد و رفت مزید محفوظ اور مؤثر بنائی جا سکے گی۔انہوں نے کہا کہ اس اقدام سے جنوبی اور وسطی کشمیر کے درمیان ریلوے رابطہ مزید مضبوط ہوگا، جس سے وادی کشمیر کی سماجی و اقتصادی ترقی کو بھی فروغ ملنے کی توقع ہے۔شمالی ریلوے کے جموں ڈویژن نے محفوظ، تیز رفتار اور آرام دہ سفر کی فراہمی کے اپنے عزم کا اعادہ کرتے ہوئے مسافروں سے اپیل کی ہے کہ وہ دورانِ سفر تمام حفاظتی ہدایات پر عمل کریں اور ریلوے املاک کے تحفظ میں تعاون کریں۔

ہندوستھان سماچار

---------------

ہندوستان سماچار / محمد اصغر