نئی دہلی، 25 جون (ہ س)۔ قومی تحقیقاتی ایجنسی (این آئی اے) نے مغربی بنگال کے مالدہ ضلع میں اسمبلی انتخابات سے پہلے خصوصی جامع نظرثانی (ایس آئی آر) آپریشن کے دوران تشدد، سڑک کی ناکہ بندی اور عدالتی افسران کو یرغمال بنانے کے سلسلے میں ایک اور ملزم کو گرفتار کیا ہے۔ گرفتار ملزم کی شناخت صائم چودھری عرف بابو چودھری کے طور پر کی گئی ہے جو مالدہ کے موتھا باڑی علاقے کا مقامی سیاسی رہنما ہے۔

این آئی اے نے جمعرات کو کہا کہ صائم چودھری کو کولکاتا میں ایجنسی کے برانچ آفس میں تفتیش کے بعد حراست میں لے لیا گیا۔ اس معاملہ میں اب تک کل 30 ملزمین کو گرفتار کیا جا چکا ہے۔

ایجنسی کے مطابق، وہ اسمبلی انتخابات سے قبل مالدہ ضلع میں ووٹر لسٹ کی خصوصی جامع نظرثانی کے دوران ہجومی تشدد، تشدد اور عدالتی افسران کی غیر قانونی قید سے متعلق ایک درجن سے زیادہ معاملات کی تحقیقات کر رہی ہے۔

تحقیقات سے پتہ چلا ہے کہ صائم چودھری یکم اپریل کو بلاک II کے بی ڈی او آفس میں عدالتی افسران کی غیر قانونی حراست میں مرکزی ملزم تھا۔ تشدد میں نو پولیس اہلکار زخمی ہوئے تھے۔

این آئی اے کے مطابق ملزمین نے واقعہ سے ایک دن قبل بلاک ڈیولپمنٹ آفیسر کے دفتر کے سامنے تقریر کرکے لوگوں کو پرتشدد احتجاج پر اکسایا۔ اس نے دیگر شریک ملزمان کے ساتھ مل کر سازش کی اور ایس آئی آر آپریشن کے دوران تشدد، ڈرانے دھمکانے اور سرکاری کام میں رکاوٹ ڈالنے کی غیر قانونی سرگرمیوں میں فعال کردار ادا کیا۔

این آئی اے نے کہا کہ مالدہ میں اپریل میں انتخابات سے قبل ہونے والے بڑے پیمانے پر تشدد کے پیچھے بڑی سازش کا پردہ فاش کرنے اور تمام ملزمین کی شناخت کے لیے تحقیقات جاری ہے۔ ایجنسی نے سپریم کورٹ کی ہدایت پر ان مقدمات کی تحقیقات شروع کی، جس نے اپریل میں تشدد کا از خود نوٹس لیا تھا۔

---------------

ہندوستان سماچار / عبدالسلام صدیقی