جموں, 20 جون (ہ س)۔

جموں و کشمیر کے دیگر علاقوں کی طرح ضلع ڈوڈہ میں گزشتہ 22 روز سے جاری صفائی ملازمین کی کام چھوڑ ہڑتال عارضی طور پر ختم کر دی گئی ہے، جس کے بعد شہر بھر میں جمع کچرے اور گندگی کے ڈھیروں کو صاف کرنے کا عمل دوبارہ شروع ہو گیا ہے۔گزشتہ تین ہفتوں کے دوران شہر کی مصروف گلیوں، کوچوں اور بازاروں میں صفائی نہ ہونے کے باعث کچرے کے انبار لگ گئے تھے، جس سے شہریوں کو شدید مشکلات کا سامنا کرنا پڑ رہا تھا اور تعفن کے باعث معمولات زندگی متاثر ہو رہے تھے۔

صفائی کرمچاری یونین ڈوڈہ کے صدر ارشاد احمد واتل اور رہنما سجاد احمد نے بتایا کہ ملازمین نے اپنی ہڑتال دس روز کے لیے معطل کرنے کا فیصلہ کیا ہے۔ انہوں نے کہا کہ یونین کی اعلیٰ قیادت اور حکومت کے درمیان مذاکرات مثبت مرحلے میں داخل ہو چکے ہیں اور امید ہے کہ ملازمین کے دیرینہ مطالبات کا قابل قبول حل نکالا جائے گا۔

انہوں نے واضح کیا کہ اگر حکومت کی جانب سے مستقلی کی پالیسی وضع کرنے اور ایس آر او سے متعلق مطالبات پر عمل درآمد نہیں کیا گیا تو ملازمین دوبارہ ہڑتال شروع کرنے پر مجبور ہوں گے۔ہڑتال کے خاتمے کے بعد میونسپل عملے نے شہر کے مختلف علاقوں میں صفائی مہم تیز کر دی ہے، جس پر شہریوں نے اطمینان کا اظہار کرتے ہوئے مستقل بنیادوں پر مسئلے کے حل کی ضرورت پر زور دیا ہے۔

ہندوستھان سماچار

---------------

ہندوستان سماچار / محمد اصغر