خوفناک سڑک حادثہ : بائیک اور کار کی ٹکر میں دو نوجوان ہلاک، ایک شدید زخمی، شہڈول ریفر

امریا، 20 جون (ہ س)۔ مدھیہ پردیش کے امریا ضلع کے مانپور تھانہ علاقے کے تحت مانپور-جے سنگھ نگر روڈ (ایس ایچ-10) پر کھٹار میں واقع فارم ہاوس کے پاس ہفتہ کے روز خوفناک سڑک حادثہ پیش آیا۔ بائیک اور کار کے درمیان آمنے سامنے ہوئی زوردار ٹکر میں بائیک سوار دو نوجوانوں کی موت ہو گئی، جب کہ ایک نوجوان شدید طور پر زخمی ہو گیا۔ زخمی کو علاج کے لیے میڈیکل کالج شہڈول ریفر کیا گیا ہے۔

معلومات کے مطابق مانپور کے گووردے گاوں کے کھیربھان ٹولہ کے رہنے والے تین نوجوان رشتہ داری میں گئے تھے۔ ہفتہ کی صبح وہ بائیک سے اپنے گھر لوٹ رہے تھے۔ گھر پہنچنے سے تقریباً ڈیڑھ سے دو کلومیٹر پہلے ہی کھٹار کے پاس ان کی بائیک کار کی زد میں آ گئی۔ حادثہ اتنا خوفناک تھا کہ تینوں نوجوان شدید طور پر زخمی ہو گئے۔

اس حادثے میں رام کیش کیوٹ ولد رام بھجن کیوٹ ساکن گووردے کی موقع پر ہی موت ہو گئی۔ وہیں پردیپ کیوٹ ولد منا کیوٹ (30) نے کمیونٹی ہیلتھ سینٹر مانپور پہنچنے سے پہلے ہی دم توڑ دیا۔ تیسرے نوجوان ہمانشو کیوٹ ولد امیش کیوٹ (26) کو نازک حالت میں شہڈول میڈیکل کالج ریفر کیا گیا ہے۔

مانپور تھانہ انچارج مکیش مرسکولے نے بتایا کہ کار کے ڈرائیور دھیریندر مہوبیا ولد لکشمن مہوبیا ساکن کھٹار نے لاپرواہی سے گاڑی چلاتے ہوئے بائیک کو ٹکر مار دی۔ حادثے میں ایک نوجوان کی جائے وقوعہ پر اور دوسرے کی اسپتال لے جاتے وقت موت ہوئی۔ پولیس نے کار ڈرائیور کو حراست میں لے لیا ہے۔ دونوں متوفی نوجوانوں کی لاشوں کا پوسٹ مارٹم کرایا جا رہا ہے۔ پولیس نے معاملہ درج کر کے حادثے کی وجوہات کی جانچ شروع کر دی ہے۔

وہیں واقعے کے بعد علاقے میں سوگ کا ماحول ہے۔ مقامی لوگوں نے سڑک سیکورٹی اور تیز رفتار گاڑیوں پر کنٹرول کے حوالے سے تشویش کا اظہار کیا ہے۔ پولیس کا کہنا ہے کہ جانچ کے بعد مزید قانونی کارروائی کی جائے گی۔

ہندوستھان سماچار

---------------

ہندوستان سماچار / انظر حسن