اچھلدا میں راجدھانی ایکسپریس کی زد میں آنے سے نوجوان کی موت، 15 منٹ ٹرین رکی

اوریا، 2 جون (ہ س)۔ دہلی-ہاوڑہ ریل روٹ پر اتر پردیش کے اوریا ضلع میں واقع اچھلدا اسٹیشن کے پاس پیر کی رات ایک دردناک حادثے میں نامعلوم نوجوان کی ٹرین کی زد میں آنے سے موت ہو گئی۔ واقعے کے بعد ٹریک پر لاش پڑی ہونے کی وجہ سے راجدھانی ایکسپریس کو تقریباً 15 منٹ تک روکنا پڑا۔ معلومات کے مطابق، پیر کی رات تقریباً 9.07 بجے 12310 راجیندر نگر تیجس راجدھانی ایکسپریس کے لوکو پائلٹ نے اچھلدا اسٹیشن ماسٹر کو اطلاع دی کہ ڈاون لائن پر کھمبا نمبر 1117/16 کے پاس ایک شخص ٹرین کی زد میں آ گیا ہے۔ اطلاع ملتے ہی ریلوے انتظامیہ میں ہلچل مچ گئی۔

ٹریک پر لاش پڑی ہونے کی وجہ سے کانپور کی طرف جا رہی راجدھانی ایکسپریس کو آوٹر کے ہوم سگنل پر روکنا پڑا۔ اسٹیشن ماسٹر کی اطلاع پر جائے وقوعہ پر پہنچے پوائنٹ مین نے ٹریک سے لاش کو ہٹایا، جس کے بعد تقریباً 15 منٹ بعد ٹرین کو آگے کے لیے روانہ کیا گیا۔ متوفی کی عمر تقریباً 35 برس بتائی جا رہی ہے۔ اس کے جسم پر صرف نیلے رنگ کا جانگھیا تھا، جبکہ جائے وقوعہ پر اورینج رنگ کی شرٹ، نیلے رنگ کا لوور اور ایک لال بیلٹ بھی پڑی ملی۔ نوجوان کی شناخت خبر لکھے جانے تک نہیں ہو سکی تھی۔

واقعے کی اطلاع اسٹیشن ماسٹر نے جی آر پی پھپھوند کو دی۔ جی آر پی انچارج وکرم سنگھ نے بتایا کہ اطلاع ملتے ہی پولیس ٹیم جائے وقوعہ پر پہنچ گئی۔ لاش کو قبضے میں لے کر اس کی شناخت کرانے کی کوششیں کی جا رہی ہیں۔ شناخت ہونے کے بعد مزید قانونی کارروائی کی جائے گی۔

ہندوستھان سماچار

---------------

ہندوستان سماچار / انظر حسن