مردم شماری ڈیوٹی پر جا رہے ہیڈ ماسٹر کی سڑک حادثے میں موت

نوئیڈا، 2 جون (ہ س)۔ تھانہ دنکور علاقے کے سرکپور گاوں کے رہنے والے ایک اسکول کے ہیڈ ماسٹر کی پیر کو مردم شماری ڈیوٹی پر جاتے وقت سڑک حادثے میں موت ہو گئی۔ واقعے کی اطلاع ملتے ہی خاندان میں کہرام مچ گیا۔ اہل خانہ نے نامعلوم گاڑی کے ڈرائیور کے خلاف پولیس میں شکایت درج کرائی ہے۔

تھانہ دنکور کے انچارج انسپکٹر منوج کمار سنگھ نے بتایا کہ سرکپور گاوں کے رہنے والے بالکشن بلند شہر ضلع کے خرجہ علاقے کے حسن پور لڈوکی گاوں میں واقع کمپوزٹ اسکول میں ہیڈ ماسٹر کے عہدے پر تعینات تھے۔ پیر کی صبح وہ اپنی بائیک سے مردم شماری ڈیوٹی کے لیے گھر سے نکلے تھے۔ جب وہ دنکور کوتوالی علاقے کے چانگولی موڑ کے پاس پہنچے، تبھی کسی نامعلوم گاڑی نے ان کی بائیک میں زوردار ٹکر مار دی۔

ٹکر لگتے ہی وہ سڑک پر گر کر شدید طور پر زخمی ہو گئے۔ حادثے کے بعد گاڑی کا ڈرائیور موقع سے فرار ہو گیا۔ راہگیروں کی اطلاع پر پولیس موقع پر پہنچی اور زخمی ٹیچر کو فوری طور پر ضلع اسپتال پہنچایا۔ ڈاکٹروں نے ان کی نازک حالت کو دیکھتے ہوئے علاج شروع کیا، لیکن زیادہ چوٹیں آنے کی وجہ سے انہیں بچایا نہیں جا سکا۔

کوتوالی انچارج نے بتایا کہ پولیس معاملے کی جانچ کر رہی ہے۔ انہوں نے بتایا کہ پولیس آس پاس لگے سی سی ٹی وی کیمروں کی فوٹیج بھی کھنگال رہی ہے تاکہ حادثے کو انجام دینے والی گاڑی اور اس کے ڈرائیور کی شناخت کی جا سکے۔

ہندوستھان سماچار

---------------

ہندوستان سماچار / انظر حسن