۔نئے سی ڈی ایس اور بحریہ کے سربراہ نے کرتویہ بھون میں وزیر دفاع راج ناتھ سنگھ سے ملاقات کی

نئی دہلی، 02 جون (ہ س)۔ چیف آف ڈیفنس اسٹاف (سی ڈی ایس) اور بحریہ کے سربراہ کی تبدیلی کے ساتھ اس سال کے آخر تک ہندوستانی مسلح افواج کی اعلیٰ قیادت مکمل طور پر تبدیل ہو جائے گی۔ ملک کے نئے چیف آف ڈیفنس اسٹاف (سی ڈی ایس) جنرل این ایس راجا سبرامنی اور بحریہ کے سربراہ ایڈمرل کرشنا سوامیناتھن نے منگل کو کرتویہ بھون میں وزیر دفاع راج ناتھ سنگھ سے ملاقات کی۔ دونوں افسران نے 31 مئی کو اپنے-اپنے عہدوں کو سنبھالا تھا۔

ملک کے تیسرے چیف آف ڈیفنس اسٹاف (سی ڈی ایس) کا عہدہ سنبھالنے والے جنرل این ایس راجا سبرامانی نے کہا کہ مسلح افواج میں تبدیلیکے لیے تنظیمی اصلاحات پر اہم توجہ ہو گی۔ خود انحصاری ہماری قومی سلامتی کا مرکزی ستون ہے۔ ہم اپنی مسلح افواج کے لیے دیسی ساختہ ہتھیار تیار کریں گے اور انہیں تیزی سے سروس میں شامل کریں گے۔ اسی طرح، نئے بحریہ کے سربراہ، ایڈمرل کرشنا سوامیناتھن نے کہا، ’’میں اپنی زندگی کاہر دن بحریہ کو بہتر، مضبوط، تیز تر اور زیادہ موثر بنانے کے لیے وقف کروں گا، تاکہ یہ قومی سلامتی اور قومی ترقی کے مفادات کو پورا کر سکے۔ میری اولین ترجیح اس بات کو یقینی بنانا ہو گی کہ ہندوستانی بحریہ آپریشنل تیاری اور لڑائی میںموثر ہونے کا اعلیٰ ترین درجے کو برقرار رکھے، تاکہ یہ ملک کے معاشی مفادات کا تحفظ کر سکے۔‘‘

نئے سی ڈی ایس، جنرل سبرامنی، موجودہ چیف آف آرمی اسٹاف، جنرل اوپیندر دویدی اور چیف آف ایئر اسٹاف، ایئر چیف مارشل اے پی سنگھ سے جونیئر ہیں، لیکن اب عہدے کی رینک میں سب سے آگے ہین۔ جنرل اوپیندر دویدی اس ماہ کے آخر میں آرمی چیف کے عہدے سے ریٹائر ہو رہے ہیں لیکن ایئر چیف کے پاس ابھی پانچ ماہ باقی ہیں۔ اعلیٰ حکام کے تبادلے بلاشبہ اس امید کے ساتھ کیے جا رہے ہیں کہ موجودہ نظام جاری رہے گا اور مجوزہ انٹیگریٹڈ تھیئٹر کمانڈز اس وقت تک فعال نہیں ہوں گے۔ اگر تھیئٹر کمانڈز جلد شروع ہو جاتے ہیں تو، ہندوستان کے فوجی عہدے کی رینکنگ میں بہت سی تبدیلیاں، پرموشن اور ردوبدل ہونے کا امکان ہے۔

ڈیفنس ریسرچ اینڈ ڈیولپمنٹ آرگنائزیشن (ڈی آر ڈی او) کے چیئرمین ڈاکٹر سمیر وی کامتھ بھی ریٹائر ہو رہے ہیں۔ کامتھ نے اگست 2022 میں ڈی آر ڈی او کے چیئرمین کا عہدہ سنبھالا تھا۔ مرکزی حکومت نے انہیں 2024، 2025 اور 2026 میں ڈی آر ڈی او کے چیئرمین کے طور پر مسلسل ایک -ایک سال کی توسیع دی ہے، لیکن اب وہ ریٹائر ہونے والے ہیں۔ ایئر چیف مارشل امر پریت سنگھ اور دفاعی سکریٹری راجیش کمار سنگھ 30 اکتوبر کو ریٹائر ہو جائیں گے۔ حالیہ تاریخ میں یہ پہلی بار ہو گا کہ اس سال محکمہ دفاع میں اتنی بڑی تبدیلی رونما ہو گی۔

ہندوستھان سماچار

ہندوستان سماچار / محمد شہزاد