نئی دہلی، 02 جون (ہ س)۔ تلنگانہ ریاست کے یوم تاسیسکے موقع پر صدر جمہوریہ، نائب صدر جمہوریہ، لوک سبھا اسپیکر، مرکزی وزراء، مختلف ریاستوں کے وزرائے اعلیٰ نے ریاست کے عوام کو مبارکباد پیش کی ہے اور اس کے روشن مستقبل، مسلسل ترقی اور خوشحالی کے لیے اپنی نیک خواہشات کا اظہار کیا۔
اپنی ایکس پوسٹ میں صدر جمہوریہ دروپدی مرمو نے تلنگانہ کے عوام کو مبارکباد دیتے ہوئے کہا کہ ریاست بھرپور ثقافتی ورثے اور محنتی شہریوں سے مالامال ہے۔ انہوں نے اس بات کا ذکر کیا کہ تلنگانہ نے اختراعات اور ترقی میں نمایاں پیش رفت کی ہے اور ریاست کے عوام کی بہبود اور ترقی کی خواہش کی۔
نائب صدر جمہوریہ رادھا کرشنن نے کہا کہ تلنگانہ اپنی بھرپور ثقافتی ورثہ اور متحرک روایات کے لیے جانا جاتا ہے۔ انہوں نے مزید کہا کہ ریاستی عوام کی تخلیقی صلاحیتوں، اختراعات، محنت اور استقامت نے ملک کی ترقی میں نمایاں کردار ادا کیا ہے۔ انہوں نے اس موقع کو ترقی یافتہ ہندوستان کی تعمیر کے لیے اجتماعی کوششوں کے لیے ایک تحریک قرار دیا۔
لوک سبھا اسپیکر اوم برلا نے تلنگانہ کو ایک الگ ثقافتی شناخت، متحرک روایات اور قدرتی خوبصورتی والی ریاست قرار دیتے ہوئے کہا کہ یوم تاسیس ریاست کی ترقی کے سفر اور کامیابیوں کی علامت ہے۔ انہوں نے ریاست کے لوگوں کی ترقی، ہم آہنگی اور خوشحالی کی خواہش کی۔
مرکزی وزیر داخلہ اور امداد باہمی امت شاہ نے کہا کہ تلنگانہ اپنی زندہ دل ثقافت اور کاروباری جذبے کے لیے منفرد طور پر جانا جاتا ہے۔ انہوں نے ریاست کی مسلسل ترقی اور خوشحالی کی خواہش کرتے ہوئے کہا کہ اس کی کامیابیاں ہندوستان کے وقار میں مزید اضافہ کریں گی۔
مرکزی ہاؤسنگ اور شہری امور کے وزیر منوہر لال نے تلنگانہ کے یوم تاسیس کے موقع پر تلنگانہ کے عوام کو مبارکباد دیتے ہوئے کہا کہ شاندار ورثے اور قدرتی حسن سے مالا مال ریاست ترقی اور خوشحالی کے راستے پر آگے بڑھتی رہے۔ انہوں نے تمام شہریوں کی زندگیوں میں امن، خوشی اور خوشحالی کی خواہش کی۔
مرکزی زراعت اور کسانوں کی بہبود کے وزیر شیوراج سنگھ چوہان نے تلنگانہ کے منفرد فن و ثقافت، بھرپور ورثے اور قدرتی حسن کاذکر کرتے ہوئے ریاست کے لوگوں کے لیے اپنی نیک خواہشات کا اظہار کیا۔ انہوں نے ریاست پر زور دیا کہ وہ ترقی اور خوشحالی کی راہ پر گامزن رہے اور ہر ایک کے لیے امن ، خوشی اور بھلائی لائے۔
مرکزی وزیر گری راج سنگھ نے ریاست کے یوم تاسیس پر مبارکباد پیش کرتے ہوئے تلنگانہ کی شاندار ثقافتی ورثے، شاندار تاریخ، لوک روایات اور تنوع کو سلام کیا۔
بی جے پی کے قومی صدر نتن نوین نے کہا کہ تلنگانہ اپنے بھرپور ثقافتی ورثے اور متحرک عوامی جذبے کے لیے جانا جاتا ہے۔ انہوں نے ریاست کی مسلسل ترقی اور شہریوں کی خوشی، خوشحالی اور اچھی صحت کی خواہش کی۔
کانگریس کے صدر ملکارجن کھرگے نے یوم تاسیس تلنگانہ کو ہندوستان کے جمہوری سفر میں ایک تاریخی سنگ میل قرار دیتے ہوئے کہا کہ ریاست کا قیام لاکھوں لوگوں کی جدوجہد، قربانیوں اور امنگوں کا نتیجہ ہے۔ تلنگانہ تحریک کے شہیدوں کو خراج عقیدت پیش کرتے ہوئے انہوں نے کہا کہ کانگریس حکومت پرجالا تلنگانہ کے عزم کو عملی جامہ پہنانے کی سمت کام کر رہی ہے۔
مدھیہ پردیش کے وزیر اعلی موہن یادو نے تلنگانہ کے بھرپور ثقافتی ورثے، فن اور محنت کی ستائش کی اور ریاست کی مسلسل ترقی کی خواہش کی۔
چھتیس گڑھ کےوزیر اعلی وشنو دیو سائے نے تلنگانہ کو شاندار تاریخ، متحرک لوک روایات اور قدرتی حسن سے مالا مال ریاست قرار دیا اور ریاست کی مسلسل ترقی اور خوشحالی کی خواہش کی۔
ہندوستھان سماچار
ہندوستان سماچار / محمد شہزاد
