شولاپور، 2 جون (ہ س) ودھان پریشد کے انتخابات کے پس منظر میں شولاپور میں بھارتیہ جنتا پارٹی اور کانگریس کے کارکنوں کے درمیان شدید نعرہ بازی کے باعث کچھ وقت کے لیے سیاسی ماحول گرم ہو گیا۔ دونوں جماعتوں کے کارکن آمنے سامنے آ گئے جس سے ضلع کلکٹر دفتر کے اطراف بڑی تعداد میں لوگوں کا ہجوم جمع ہو گیا۔

اطلاعات کے مطابق نامزدگی فارموں کی جانچ کے دوران مختلف اعتراضات اور سیاسی الزامات و جوابی الزامات کے پس منظر میں بی جے پی اور کانگریس کے کارکن ضلع کلکٹر دفتر پہنچے تھے۔ اس موقع پر دونوں جماعتوں کے حامیوں نے اپنی اپنی پارٹی کے حق میں زوردار نعرے لگاتے ہوئے طاقت کا مظاہرہ کیا۔ دونوں گروپوں کی جانب سے ایک دوسرے کے خلاف شدید نعرہ بازی کی گئی، جس کے نتیجے میں کچھ وقت کے لیے علاقے میں کشیدہ ماحول پیدا ہو گیا۔ صورتحال کی سنگینی کو دیکھتے ہوئے پولیس نے فوری مداخلت کی اور دونوں فریقوں سے تحمل اور امن برقرار رکھنے کی اپیل کی۔

کسی بھی ناخوشگوار واقعے سے بچنے کے لیے ضلع کلکٹر دفتر کے اطراف پولیس بندوبست میں اضافہ کر دیا گیا تھا۔ پولیس کی مستعدی اور بروقت کارروائی کے باعث صورتحال قابو میں رہی اور کوئی ناخوشگوار واقعہ پیش نہیں آیا۔ سیاسی مبصرین کا ماننا ہے کہ ودھان پریشد انتخابات کے سلسلے میں بڑھتی ہوئی سیاسی رقابت کے باعث آنے والے دنوں میں ریاست خصوصاً سولاپور میں سیاسی سرگرمیاں اور کشیدگی مزید بڑھ سکتی ہے۔

ہندوستھان سماچار

--------------------

ہندوستان سماچار / جاوید این اے