جموں و کشمیر میں اولا کیب سروس کا لائسنس منسوخ

جموں، 02 جون (ہ س)۔ جموں و کشمیر کے ٹرانسپورٹ کمشنر نے معروف کیب سروس کمپنی اولا کا موٹر وہیکل ایگریگیٹر لائسنس فوری طور پر منسوخ کر دیا ہے۔ ٹرانسپورٹ کمشنر کے جاری کردہ حکم نامے کے مطابق، کمپنی کا لائسنس نمبر 0001 اس وقت منسوخ کیا گیا جب جموں میں قائم اس کے رجسٹرڈ برانچ دفتر کا معائنہ کیا گیا۔ معائنے کے دوران دفتر غیر فعال اور ناقابلِ سراغ پایا گیا۔

حکم نامے میں کہا گیا ہے کہ متعلقہ دفتر مقررہ مقام پر موجود نہیں تھا اور نہ ہی وہاں کسی قسم کی سرگرمی پائی گئی، جس کے باعث کمپنی کے خلاف کارروائی عمل میں لائی گئی۔ حکام کے مطابق لائسنس کی منسوخی فوری اثر سے نافذ ہوگی۔واضح رہے کہ اولا ملک کی معروف آن لائن ٹیکسی سروس کمپنیوں میں شمار ہوتی ہے، تاہم جموں و کشمیر میں اس کے رجسٹرڈ دفتر کی غیر موجودگی اور غیر فعال حیثیت کے باعث محکمہ ٹرانسپورٹ نے یہ فیصلہ لیا ہے۔

ہندوستھان سماچار

---------------

ہندوستان سماچار / محمد اصغر