ریاسی پولیس نے ایک منشیات فروش کو گرفتار کیا

جموں، 02 جون (ہ س)۔ جموں و کشمیر کو منشیات سے پاک بنانے کی مہم نشہ مُکت جموں و کشمیر ابھیان کے تحت ریاسی پولیس نے ایک اور کامیاب کارروائی انجام دیتے ہوئے مبینہ منشیات فروش کو گرفتار کر لیا اور اس کے قبضے سے ہیروئن برآمد کی۔ پولیس کے مطابق گزشتہ روز بالنی ناکہ پر ناکہ چیکنگ کے دوران پولیس اسٹیشن کٹرا کی ایک ٹیم نے کٹرا سے ریاسی کی جانب جا رہے ایک الیکٹرک آٹو کو روک کر تلاشی لی۔آٹو انل شرما ولد شباش چندر سکنہ سرون آگر جتو، تحصیل کٹرا، ضلع ریاسی چلا رہا تھا۔ تلاشی کے دوران پولیس نے ملزم کے قبضے سے تقریباً 6.3 گرام ہیروئن (چٹا) برآمد کی۔برآمدگی کے بعد ملزم کو موقع پر ہی گرفتار کر لیا گیا جبکہ منشیات کو قانونی ضابطوں کے تحت ضبط کر لیا گیا۔

پولیس نے بتایا کہ اس سلسلے میں پولیس اسٹیشن کٹرا میں ایف آئی آر نمبر 166/2026 درج کر کے این ڈی پی ایس ایکٹ کی دفعات 8/21/22 کے تحت مقدمہ قائم کیا گیا ہے۔پولیس نے کہا کہ برآمد شدہ منشیات کے ذرائع اور اس کی ممکنہ سپلائی چین کا پتہ لگانے کے لیے مزید تحقیقات جاری ہیں تاکہ اس نیٹ ورک سے وابستہ دیگر افراد کی نشاندہی کی جا سکے۔ریاسی پولیس نے منشیات کے خلاف اپنی کارروائیاں جاری رکھنے کے عزم کا اعادہ کرتے ہوئے عوام سے اپیل کی ہے کہ وہ منشیات فروشی اور نشہ آور اشیاء کے استعمال سے متعلق معلومات قانون نافذ کرنے والے اداروں کے ساتھ شیئر کریں تاکہ معاشرے کو منشیات کی لعنت سے پاک بنایا جا سکے۔

ہندوستھان سماچار

---------------

ہندوستان سماچار / محمد اصغر