جموں, 19 جون (ہ س)۔

سانبہ پولیس نے ایک بڑی کامیابی حاصل کرتے ہوئے جموں و کشمیر اور پنجاب میں بھتہ خوری سمیت مختلف مجرمانہ سرگرمیوں میں ملوث خطرناک بین ریاستی گینگ کا پردہ فاش کیا ہے۔ پولیس کے مطابق یہ گینگ جیل میں بند گینگسٹر روہت کمار عرف مکھن کی ہدایت پر کام کر رہا تھا اور اس کے روابط پنجاب کے کئی جرائم پیشہ عناصر سے تھے۔

پولیس نے بتایا کہ مذکورہ گینگ کا تعلق چنڈی گڑھ میں پیش آئے حالیہ فائرنگ کے ایک واقعے سے بھی جوڑا جا رہا ہے، جس میں دن دہاڑے ایک فارمیسی ملازم ہلاک ہو گیا تھا۔

تحقیقات کے دوران انکشاف ہوا کہ روہت کمار عرف مکھن مختلف پنجاب کے گینگسٹروں کے ساتھ مل کر مجرمانہ نیٹ ورک چلا رہا تھا اور غیر قانونی سرگرمیوں کو منظم کرنے میں کلیدی کردار ادا کر رہا تھا۔

کارروائی کے دوران گرفتار کیے گئے ملزمان کی شناخت امیت کمار عرف شرابی، اجے کمار، مانک سنہوترا، وویک مہرا، سنی مہرا اور آرین شرما کے طور پر کی گئی ہے۔ پولیس کے مطابق امیت کمار عرف شرابی اس گینگ کا اہم سرغنہ ہے۔

پولیس نے مزید بتایا کہ سنی مہرا اور آرین شرما، جنہیں پہلے ہی گرفتار کیا جا چکا تھا، اُن کو جاری تحقیقات کے سلسلے میں چندی گڑھ پولیس کے حوالے کر دیا گیا ہے۔

ملزمان کی نشاندہی پر پولیس نے اسلحہ اور گولہ بارود کا ایک ذخیرہ بھی برآمد کیا، جس میں ایک اے کے-47 میگزین، اے کے-47 کے 38 کارتوس، پستول کے 10 کارتوس، دو دیسی پستول، ایک دیسی کٹا، ایک ٹوکا اور 18 ہزار روپے نقد شامل ہیں۔

پولیس حکام کے مطابق گینگ سے وابستہ دیگر اہم ساتھیوں کی شناخت اور گرفتاری کے لیے کارروائیاں جاری ہیں۔ ان کا کہنا ہے کہ اس کامیاب آپریشن سے بین ریاستی جرائم پیشہ نیٹ ورک کو بڑا دھچکا پہنچا ہے اور سانبہ ضلع میں امن و امان کو مزید مضبوط بنانے میں مدد ملے گی۔ معاملے کی مزید تحقیقات جاری ہیں۔

ہندوستھان سماچار

---------------

ہندوستان سماچار / محمد اصغر