علی گڑھ, 19 جون (ہ س)۔

علی گڑھ مسلم یونیورسٹی کے شعبہ نفسیات کے چیئرمین پروفیسر شاہ عالم نے ‘‘دماغی صحت اور سماجی شمولیت’’ کے موضوع پر نیشنل انسٹی ٹیوٹ آف ٹکنالوجی (این آئی ٹی) پٹنہ کے شعبہ ہیومینٹیز اینڈ سوشل سائنسز کی جانب سے انڈین کونسل آف سوشل سائنس ریسرچ (آئی سی ایس ایس آر)، وزارتِ تعلیم، حکومت ہند کے تعاون سے منعقدہ دس روزہ ریسرچ میتھوڈولوجی کورس میں مہمانِ اعزازی اور ریسورس پرسن کے طور پر شرکت کی۔

پروفیسر شاہ عالم نے دماغی صحت کی تحقیق میں حالیہ پیش رفت کے موضوع پر دو تکنیکی سیشن منعقد کیے، جن میں انہوں نے ابھرتے ہوئے رجحانات، تکنیکی اختراعات اور دماغی صحت کے فروغ اور مداخلت سے متعلق جدید طریق ہائے عمل پر روشنی ڈالی۔ انہوں نے دماغی صحت کو صحت عامہ کے ایک اہم مسئلے کے طور پر بیان کرتے ہوئے اس شعبے میں سائنسی طور پر مستحکم اور سماجی طور پر بامعنی تحقیق کی ضرورت پر زور دیا۔

ملک بھر سے شریک پوسٹ گریجویٹ طلبہ، ریسرچ اسکالرز، پوسٹ ڈاکٹریٹ فیلوز اور ماہرین سے خطاب کرتے ہوئے انہوں نے تعلیمی دباؤ، بے روزگاری، سوشل میڈیا کے بڑھتے استعمال، گھریلو تنازعات، منشیات کے استعمال اور سماجی و معاشی نابرابریوں کے ذہنی صحت پر اثرات، خصوصاً نوجوانوں کی ذہنی صحت کے حوالے سے تفصیلی گفتگو کی۔

پروفیسر شاہ عالم نے دماغی صحت سے متعلق احتیاطی اقدامات، نفسیاتی مسائل کی ابتدائی شناخت، آسانی سے دستیاب مشاورتی خدمات اور شواہد پر مبنی تحقیق کی اہمیت کو بھی اجاگر کیا، تاکہ موجودہ دور میں ذہنی صحت سے متعلق چیلنجوں کا مؤثر انداز میں مقابلہ کیا جا سکے۔

---------------

ہندوستان سماچار / سید کامران علی گڑھ