جموں، 19 جون (ہ س)۔ سالانہ شری امرناتھ یاترا کے پیش نظر ریلوے پروٹیکشن فورس (آر پی ایف) کی ڈائریکٹر جنرل سونالی مشرا نے جمعہ کے روز کٹھوعہ ریلوے اسٹیشن کا دورہ کرکے سیکورٹی انتظامات کا جائزہ لیا اور تمام متعلقہ ایجنسیوں کے درمیان بہتر تال میل کو مزید مضبوط بنانے کی ضرورت پر زور دیا۔ سرکاری حکام کے مطابق سونالی مشرا نے یاترا کے دوران یاتریوں کی محفوظ آمد و رفت کو یقینی بنانے کے لیے کیے گئے انتظامات کا تفصیلی جائزہ لیا۔ اس موقع پر ریلوے، آر پی ایف، جموں ڈویژن کے سیکورٹی حکام اور پولیس محکمہ کے سینئر افسران بھی موجود تھے۔

نامہ نگاروں سے بات کرتے ہوئے سونالی مشرا نے کہا کہ سیکورٹی انتظامات کا جائزہ لیا گیا ہے اور انہیں مزید مضبوط بنایا جا رہا ہے۔ انہوں نے کہا کہ تمام متعلقہ ایجنسیوں کے درمیان قریبی رابطے کے ساتھ کام جاری ہے جبکہ جدید تکنیکی آلات اور نگرانی کے نظام کو بھی سیکورٹی گرڈ کا حصہ بنایا گیا ہے۔

انہوں نے کہا کہ اجلاس میں سیکورٹی تیاریوں کے تمام پہلوؤں پر غور کیا گیا اور مستقبل میں مزید بہتر تال میل کے ساتھ سیکورٹی نظام کو مستحکم بنانے پر اتفاق کیا گیا۔

واضح رہے کہ سالانہ شری امرناتھ یاترا 3 جولائی سے شروع ہوگی، جو اننت ناگ ضلع کے روایتی ننون-پہلگام راستے اور گاندربل ضلع کے بالتل راستے سے انجام دی جائے گی، جبکہ یاترا 28 اگست کو رکشا بندھن کے موقع پر اختتام پذیر ہوگی۔ یاترا کے دوران ہزاروں عقیدت مندوں کی حفاظت کے لیے پولیس، نیم فوجی دستوں، آر پی ایف اور دیگر ایجنسیوں پر مشتمل کثیر سطحی سیکورٹی نظام تعینات کیا جاتا ہے۔ہندوستھان سماچار

---------------

ہندوستان سماچار / محمد اصغر