وزیر صحت سکینہ ایتو نے جموں میں انتظامات کا جائزہ لیا

جموں، 19 جون (ہ س)۔ جموں و کشمیر کی وزیر صحت، طبی تعلیم، سماجی بہبود اور تعلیم سکینہ ایتو نے سول سکریٹریٹ جموں میں ایک اعلیٰ سطحی بین محکمانہ اجلاس کی صدارت کرتے ہوئے آئندہ شری امرناتھ جی یاترا، محرم الحرام، مانسون کی تیاریوں اور عوامی خدمات کے انتظامات کا تفصیلی جائزہ لیا۔ اجلاس کے دوران شری امرناتھ یاترا کے لیے طبی عملے کی تعیناتی، ادویات کی دستیابی، ایمبولینس سروس، پینے کے پانی، بجلی اور صفائی ستھرائی کے انتظامات کا جائزہ لیا گیا۔ سکینہ ایتو نے محکمہ صحت اور ضلعی انتظامیہ کو ہدایت دی کہ تمام یاترا ٹرانزٹ کیمپوں میں چوبیس گھنٹے طبی عملہ اور ضروری ادویات دستیاب رکھی جائیں، جبکہ محکمہ بجلی اور محکمہ جل شکتی کو بلا تعطل بجلی اور صاف پانی کی فراہمی یقینی بنانے کو کہا۔

محرم الحرام کی تیاریوں کا جائزہ لیتے ہوئے وزیر نے تمام محکموں کے درمیان بہتر تال میل پر زور دیا اور ضروری شہری سہولیات کی بروقت فراہمی کی ہدایت دی۔ انہوں نے متعلقہ حکام کو مقامی کمیٹیوں کے ساتھ رابطے میں رہ کر وزیر اعلیٰ کی ہدایات پر عمل درآمد یقینی بنانے کو کہا۔ وزیر نے گورنمنٹ میڈیکل کالج جموں کے حکام کو اسپتالوں میں طبی آلات اور ضروری ادویات کا مناسب ذخیرہ برقرار رکھنے کی ہدایت دی اور بارشوں کے دوران رابطہ منقطع ہونے کے خدشات والے علاقوں میں اضافی ایمبولینسوں کی تعیناتی کا بھی جائزہ لیا۔

انہوں نے محکمہ صحت کو 28 جون کو منعقد ہونے والے پلس پولیو ڈے کے دوران سو فیصد ویکسینیشن کوریج اور عوامی بیداری مہم کو مؤثر بنانے کی ہدایت دی۔ مانسون تیاریوں کے حوالے سے سکینہ ایتو نے متعلقہ محکموں کو سیلاب سے متاثرہ بنیادی ڈھانچے کی مرمت، نالوں اور ڈرینیج چینلز کی صفائی کا کام جلد مکمل کرنے کی ہدایت دی، جبکہ جموں میونسپل کارپوریشن اور جموں ڈیولپمنٹ اتھارٹی کو صفائی مہم، جراثیم کش اسپرے اور کچرے کی مناسب نکاسی کے اقدامات تیز کرنے کو کہا۔

تعلیمی شعبے کا جائزہ لیتے ہوئے وزیر نے اسکول اور اعلیٰ تعلیم کے محکموں کو داخلہ عمل مقررہ مدت میں مکمل کرنے اور تعلیمی سیشن بروقت شروع کرنے کی ہدایت دی۔ انہوں نے مصنوعی ذہانت (اے آئی) پر مبنی تحقیقاتی تعلیم کے فروغ، سرکاری اسکولوں میں داخلوں میں اضافہ اور سمگر شکشا کے تحت جاری منصوبوں میں تیزی لانے پر زور دیا۔

سکینہ ایتو نے تمام محکموں کو باہمی رابطے کے ساتھ ذمہ داریاں بروقت مکمل کرنے اور آئندہ جائزہ اجلاس سے قبل ایکشن ٹیکن رپورٹ (اے ٹی آر) پیش کرنے کی ہدایت دی۔ اجلاس میں مختلف محکموں کے سربراہان اور سینئر افسران نے شرکت کی، جبکہ جموں سے باہر تعینات افسران ویڈیو کانفرنسنگ کے ذریعے شامل ہوئے۔

ہندوستھان سماچار

--------------

ہندوستان سماچار / محمد اصغر