اورائی، 18 جون (ہ س)۔

جالون ضلع کے مادھوگڑھ علاقے میں گوپال پورہ گاوں کے نزدیک جمعرات کو دریائے پہوج میں ایک المناک حادثہ پیش آیا۔ مدھیہ پردیش کے بھینڈ ضلع کے تین نوجوان دریا میں ڈوب گئے۔ واقعہ کی اطلاع ملتے ہی انتظامیہ اور محکمہ پولیس کے اہلکار فوراً موقع پر پہنچ گئے اور راحت اور بچاو کاموں کی نگرانی کی اور ضروری انتظامات کو یقینی بنایا۔ موصولہ اطلاع کے مطابق کل 17 نوجوان جن میں جگموہن بگھیل (19 سال) ولد چرن سنگھ، سدھیر بگھیل (15 سال) ولد جگدیش اور اونیش یادو (20 سال) ولد گنگا سنگھ یادو، گاوں لدھورا، تھانہ میہونہ، بھنڈ ضلع (مدھیہ پردیش) کے رہنے والے 19 جون کو منگل میں ایک شادی کی تقریب میں شریک ہوئے تھے۔ اس دوران نوجوان گوپال پورہ گاوں کے قریب دریائے پہوج میں سیر اور نہانے گئے۔ ندی میں نہاتے ہوئے تینوں نوجوان غلطی سے گہرے پانی میں جا گرے اور ڈوبنے لگے۔ دیگر نوجوانوں اور مقامی لوگوں نے انہیں بچانے کی کوشش کی لیکن ناکام رہے۔ اطلاع ملنے پر مقامی غوطہ خوروں اور ایس ڈی آر ایف کی ٹیم کو فوری طور پر جائے وقوعہ پر بلایا گیا۔ بڑے پیمانے پر تلاش اور بچاو آپریشن شروع کیا گیا اور تینوں نوجوانوں کو دریا سے نکالا گیا، لیکن تب تک وہ مر چکے تھے۔ واقعہ کی سنگینی کو دیکھتے ہوئے چیف منسٹر یوگی آدتیہ ناتھ نے فوری طور پر اس سانحہ کا نوٹس لیا۔ سوگوار خاندانوں سے اظہار تعزیت کرتے ہوئے، وزیر اعلیٰ نے حکام کو فوری طور پر جائے وقوعہ پر پہنچنے اور راحت اور بچاو کے کاموں کو تیز کرنے کی ہدایت کی۔ ضلع مجسٹریٹ راجیش کمار پانڈے اور پولیس سپرنٹنڈنٹ ونے کمار سنگھ جائے وقوعہ پر پہنچے اور متاثرین کے اہل خانہ سے ملاقات کرکے انہیں تسلی دی۔ انہوں نے ایس ڈی آر ایف اور دیگر ایجنسیوں کو ریسکیو آپریشن کو مو¿ثر طریقے سے چلانے اور متاثرہ خاندانوں کو ہر ممکن مدد فراہم کرنے کی ہدایت دی۔ انہوں نے یہ بھی ہدایت دی کہ مدھیہ پردیش حکومت کے ساتھ تال میل کرتے ہوئے مرنے والوں کی لاشیں عزت کے ساتھ ان کے اہل خانہ کے حوالے کی جائیں اور تمام ضروری رسمی کارروائیوں کو تیزی سے مکمل کیا جائے۔

ضلع مجسٹریٹ نے متعلقہ عہدیداروں کو ہدایت دی کہ واقعہ سے متعلق تمام قانونی اور انتظامی کارروائیوں کو حساسیت اور فوری طور پر مکمل کیا جائے اور اس بات کو یقینی بنایا جائے کہ سوگوار خاندانوں کو کسی قسم کی تکلیف نہ ہو۔ پولیس نے متوفی کی نعشوں کو تحویل میں لے کر پنچایت نامہ کی کارروائی جاری ہے۔لاش کو پوسٹ مارٹم کے لیے گورنمنٹ میڈیکل کالج اورائی کے مردہ خانہ میں بھیج دیا گیا ہے۔ ابتدائی تفتیش میں کوئی مجرمانہ واقعہ سامنے نہیں آیا۔ ابتدائی طور پر یہ حادثہ نہاتے ہوئے گہرے پانی میں جانے کی وجہ سے پیش آیا۔

ہندوستھان سماچار

ہندوستان سماچار / عطاءاللہ