جموں, 18 جون (ہ س)۔ مرکزی وزیر ڈاکٹر جتیندر سنگھ نے کہا ہے کہ شاہپور کنڈی ڈیم منصوبہ وزیر اعظم نریندر مودی کی قیادت والی حکومت کی کوششوں سے دوبارہ فعال ہوا اور اب تکمیل کے آخری مرحلے میں پہنچ چکا ہے۔جمعرات کو جاری اپنے بیان میں ڈاکٹر جتیندر سنگھ نے کہا کہ یہ منصوبہ ثابت قدمی اور ترقی کی ایک مثال ہے، جو جموں و کشمیر اور پنجاب کے سرحدی اضلاع میں آبپاشی کی سہولیات کو بہتر بنانے اور زرعی پیداوار میں اضافے کے ذریعے سماجی و اقتصادی ترقی میں اہم کردار ادا کرے گا۔

انہوں نے کہا کہ 1960 کے سندھ طاس معاہدے کے بعد بھارت کو راوی، بیاس اور ستلج دریاؤں کا حصہ ملا تھا، جس کے بعد 1970 کی دہائی کے اواخر میں دریائے راوی پر ایک قومی منصوبہ تجویز کیا گیا تاکہ بھارت کے حصے کا پانی ملک کے اندر استعمال کیا جا سکے۔

ڈاکٹر جتیندر سنگھ کے مطابق شاہپور کنڈی منصوبے کا سنگ بنیاد 1984 میں اس وقت کی وزیر اعظم اندرا گاندھی نے رکھا تھا، تاہم بعد ازاں یہ منصوبہ کئی دہائیوں تک التوا کا شکار رہا۔ انہوں نے کہا کہ 2014 میں مرکز میں بی جے پی حکومت کے اقتدار میں آنے کے بعد اس منصوبے کو دوبارہ شروع کرنے کے لیے جموں و کشمیر اور پنجاب کے درمیان زیر التوا معاملات کو حل کیا گیا اور نئی دستاویزات تیار کی گئیں۔

مرکزی وزیر نے کہا کہ وزیر اعظم نریندر مودی نے فروری 2019 میں جموں میں ایک عوامی جلسے کے دوران اس منصوبے کی بحالی کا اعلان کیا تھا اور اب یہ تقریباً مکمل ہو چکا ہے۔ انہوں نے کہا کہ منصوبے کی تکمیل سے جموں و کشمیر اور پنجاب کے سرحدی علاقوں میں آبپاشی کے نظام کو تقویت ملے گی اور زرعی شعبے کی ترقی کے ساتھ ساتھ خطے کی معیشت کو بھی فروغ حاصل ہوگا۔

ہندوستھان سماچار

---------------

ہندوستان سماچار / محمد اصغر