ممبئی ، 18 جون (ہ س) شیوسینا (ادھو بالاصاحب ٹھاکرے) کے رکن پارلیمنٹ اور سینئر رہنما سنجے راؤت نے پارٹی میں بغاوت کرنے والے ارکانِ پارلیمنٹ پر سخت تنقید کرتے ہوئے خبردار کیا ہے کہ اب شیوسینا (یو بی ٹی) کی جانب سے ’’آپریشن تڑوا‘‘ شروع کیا جائے گا۔ انہوں نے کہا کہ پارٹی کی یہ لڑائی اب لوک سبھا، عدالتوں اور سڑکوں پر پوری شدت کے ساتھ لڑی جائے گی۔

ممبئی میں میڈیا سے گفتگو کرتے ہوئے سنجے راؤت نے کہا کہ سڑکوں پر جدوجہد کا آغاز ہو چکا ہے اور آنے والے دنوں میں یہ مزید تیز ہوگی۔ انہوں نے باغی ارکانِ پارلیمنٹ کے شندے گروپ میں جانے کے عمل کو ’’آپریشن ٹائیگر‘‘ قرار دیے جانے پر طنز کرتے ہوئے کہا کہ کیا کوئی ٹائیگر بھی اس طرح بھاگتا ہے؟ اصل ٹائیگر تو ہم ہیں۔ اب ہمارا ’’آپریشن تڑوا‘‘ شروع ہوگا۔ راؤت نے کہا کہ بالاصاحب ٹھاکرے کے جنم صد سالہ سال میں جو سیاسی کھیل کھیلا گیا ہے، اس کا جواب وقت آنے پر ضرور دیا جائے گا۔ انہوں نے واضح کیا کہ پارٹی اس معاملے پر خاموش نہیں بیٹھے گی اور ہر سطح پر اپنا موقف مضبوطی سے پیش کرے گی۔

باغی ارکانِ پارلیمنٹ کو نشانہ بناتے ہوئے سنجے راؤت نے کہا کہ ان لوگوں نے شیوسینا کے انتخابی نشان، پارٹی کی تنظیمی طاقت اور وسائل کا استعمال کرکے انتخابات جیتے تھے۔ اس لیے اخلاقی بنیادوں پر انہیں اپنے عہدوں سے استعفیٰ دے کر دوبارہ عوام کے پاس جانا چاہیے اور نئے سرے سے انتخاب لڑنا چاہیے۔ انہوں نے کہا کہ اگر یہ ارکان دوبارہ عوامی حمایت حاصل کرکے منتخب ہو جاتے ہیں تو شیوسینا (یو بی ٹی) انہیں غدار یا دیش دروہی نہیں کہے گی، لیکن پارٹی کے نام اور نشان پر کامیابی حاصل کرنے کے بعد وفاداری تبدیل کرنا عوامی اعتماد کے ساتھ دھوکہ ہے۔

سنجے راؤت نے بھارتیہ جنتا پارٹی کے سینئر رہنما اور وزیر گریش مہاجن کو بھی تنقید کا نشانہ بنایا۔ انہوں نے الزام لگایا کہ انفورسمنٹ ڈائریکٹوریٹ (ای ڈی)، سینٹرل بیورو آف انویسٹی گیشن (سی بی آئی) اور پولیس نظام کا سیاسی مقاصد کے لیے غلط استعمال کیا جا رہا ہے۔ انہوں نے مزید دعویٰ کیا کہ پارٹی چھوڑنے والے ارکانِ پارلیمنٹ کو بڑی مقدار میں مالی لالچ دیا گیا ہے۔ راؤت کے مطابق سیاسی وفاداریاں تبدیل کرانے کے لیے طاقت اور وسائل کا استعمال کیا جا رہا ہے، جس کے خلاف شیوسینا (یو بی ٹی) ہر محاذ پر جدوجہد جاری رکھے گی۔

ہندوستھان سماچار

--------------------

ہندوستان سماچار / جاوید این اے