نئی دہلی، 18 جون (ہ س) ۔ دہلی میونسپل کارپوریشن (ایم سی ڈی) کے قائد ایوان اور اسٹینڈنگ کمیٹی کے رکن جے بھگوان یادو نے جمعرات کو شاستری نگر وارڈ نمبر 70 کا معائنہ کیا۔ انہوں نے ہدایت کی کہ وارڈ میں سڑکوں کو گڑھے سے پاک اور تجاوزات سے پاک کیا جائے تاکہ ٹریفک کی روانی کو یقینی بنایا جا سکے۔

قائد ایوان جئے بھگوان یادو نے کہا کہ وزیراعلیٰ ریکھا گپتا کے صاف ستھرے اور سرسبز دہلی کے خواب کو شرمندہ تعبیر کرنے کے لئے دہلی میں مہم چلائی جارہی ہے۔ تمام میونسپل کونسلر اس مہم میں حصہ لے رہے ہیں اور آج وہ شاستری نگر وارڈ کا معائنہ کر رہے ہیں۔ انہوں نے کہا کہ بیت الخلاءکی تعمیر، پارکس اور سڑکوں کی دیکھ بھال سے متعلق کام جو کہ فنڈز کی کمی کی وجہ سے تعطل کا شکار تھے، اب فنڈزکی کوئی کمی نہیں ہے۔

جئے بھگوان یادو نے عہدیداروں کو ہدایت دی کہ دکانوں کے باہر کسی قسم کی تجاوزات کو برداشت نہیں کیا جائے گا۔ سامان کو اندر رکھنا چاہیے۔ انہوں نے مزید کہا کہ تجاوزات کی وجہ سے نالیوں میں رکاوٹیں آتی ہیں جس سے پانی بھر جاتا ہے۔ انہوں نے بتایا کہ معائنہ کا مقصد صفائی کو یقینی بنانے کے لیے سڑکوں اور نالوں سے تجاوزات کو ہٹانا تھا۔

قائد ایوان نے کہا کہ شاستری نگر میٹرو اسٹیشن کے قریب گلی میں موجود غیرقانونی تہہ بازاری کو چادر سے ڈھانپ دیا جائے اور تمام غیر قانونی تہہبازاری کو علاقے سے ہٹا دیا جائے۔ انہوں نے ہدایت کی کہ وارڈ میں نصب ایف سی ٹی ایس کو پینٹ کیا جائے۔ یادو نے ہدایت دی کہ وارڈ میں دھول پر قابو پانے کے لیے اقدامات کیے جائیں اور ٹریفک کی روانی کو یقینی بنانے کے لیے سڑکوں پر موجود گڑھوں کو پر کیا جائے۔ معائنہ کے دوران انہوں نے صفائی کے کارکنوں سے بھی بات چیت کی اور صفائی کے آلات کی دستیابی کے بارے میں دریافت کیا۔

جئے بھگوان یادو نے شاستری نگر میں واقع مردانہ اور خواتین کے بیت الخلاء کی مناسب دیکھ بھال کی ہدایت دی۔ انہوں نے بیت الخلاء میں پانی فراہم کرنے کی ہدایت کرتے ہوئے کہا کہ بیت الخلاء کے احاطے کو اچھی طرح صاف کیا جائے تاکہ اس سے بدبو نہ آئے۔ انہوں نے شاستری نگر اے بلاک میں واقع شاستری بت پارک کا معائنہ کیا اور اس میں دیکھ بھال کے کام کرنے کی ہدایت دی۔ انہوں نے کہا کہ ہمیں دہلی کو صاف ستھرا رکھنے کے لیے شہریوں کے تعاون کی ضرورت ہے۔

قائد ایوان نے مقامی کونسلر منوج کمار جندل کے زیر انتظام کچن کا بھی معائنہ کیا۔ یہ باورچی خانہ صرف 5 روپے میں پورا کھانا فراہم کرتا ہے۔ یادو نے اس عوام دوست کام کے لیے کونسلر منوج کمار جندل کی تعریف کی اور اسے حقیقی عوامی خدمت کی بہترین مثال قرار دیا۔

معائنہ کے دوران مقامی کونسلر منوج کمار جندل، سٹی ایس پی ایریا کے ڈپٹی کمشنر کنیکا اور میونسپل کارپوریشن کے اعلیٰ افسران موجود تھے۔

---------------

ہندوستان سماچار / عبدالسلام صدیقی