رانچی، 18 جون (ہ س)۔جھارکھنڈ میں راجیہ سبھا کی دو سیٹوں کے لیے ووٹنگ جاری ہے، جھارکھنڈ مکتی مورچہ (جے ایم ایم) کے امیدوار بیجناتھ رام نے اپنی جیت پر اعتماد ظاہر کیا ہے۔ اسمبلی پہنچ کر انہوں نے کہا کہ اتحاد کے پاس کافی تعداد ہے اور دونوں سیٹیں جیتنا یقینی ہے۔

میڈیا سے بات کرتے ہوئے بیجناتھ رام نے کہا کہ ان کی جیت کے امکانات 100 فیصد ہیں۔ انہوں نے وضاحت کی کہ انتخابی حکمت عملی اور اعداد و شمار کا جائزہ لینے کے لیے اتحاد نے گزشتہ دو دنوں میں میٹنگ کی ہے۔ ساتھ ہی، ماک پول کے نتائج بھی ان کے حق میں رہے ہیں، جس سے کارکنوں کے جوش و خروش میں اضافہ ہوا ہے۔

بھارتیہ جنتا پارٹی (بی جے پی) کے حمایت یافتہ آزاد امیدوار پرمل ناتھوانی کے انتخابات میں حصہ لینے پر ردعمل ظاہر کرتے ہوئے، بیجناتھ رام نے کہا کہ ان کی جیت کا سوال ہی پیدا نہیں ہوتا ہے۔ انہوں نے دعویٰ کیا کہ اتحاد کے دونوں امیدوار راجیہ سبھا میں پہنچ جائیں گے۔

اسمبلی پہنچنے سے پہلے بیجناتھ رام نے پوجا کی اور فتح کا تلک لگایا۔ انہوںنے اسے دیوی کے کرم سے منسوب کرتے ہوئے کہا کہ وہ ہر اہم کام سے پہلے خدا سے دعا کرتے ہیں۔

سابق وزیر اور ایم ایل اے بیجناتھ رام کو جے ایم ایم نے اس بار راجیہ سبھا کے لیے نامزد کیا ہے۔

---------------

ہندوستان سماچار / عبدالسلام صدیقی