فیفا ورلڈ کپ 2026 : ایمباپے کے دو گول کی بدولت فرانس نے سینیگال کو 1-3 سے ہرایا

نیویارک، 17 جون (ہ س)۔ دو بار کی عالمی چیمپئن فرانس نے فیفا ورلڈ کپ 2026 میں اپنی مہم کا آغاز جیت کے ساتھ کیا۔ منگل کے روز کھیلے گئے گروپ-آئی کے مقابلے میں فرانس نے سینیگال کو 1-3 سے شکست دی، جس میں اسٹار اسٹرائیکر کلیان ایمباپے نے دو گول داغ کر ٹیم کی جیت میں اہم کردار ادا کیا۔

پہلے ہاف میں سینیگال نے فرانس کو سخت ٹکر دی اور کئی مواقع بھی بنائے، لیکن گول کرنے میں ناکام رہی۔ فرانس کی ٹیم بھی ابتدائی 45 منٹ میں جدوجہد کرتی نظر آئی۔ دوسرے ہاف میں کوچ دیدیے دیشاں کی حکمتِ عملی کام آئی۔ مائیکل اولیسے کو دائیں ونگ سے درمیان میں لانے کے بعد فرانس کے حملے میں تیزی آئی۔ اس کا فائدہ 66 ویں منٹ میں ملا جب اولیسے کے شاندار پاس پر ایمباپے نے باکس میں دوڑ لگاتے ہوئے گول کر کے فرانس کو 0-1 کی برتری دلا دی۔

اس کے بعد فرانس نے دباو برقرار رکھا اور میچ کے آخری مرحلے میں بریڈلی بارکولا نے دوسرا گول کر کے برتری کو دوگنا کر دیا۔ تاہم اضافی وقت میں سینیگال کے لیے ابراہیم ایمبائے نے ایک گول کر کے اسکور 1-2 کر دیا، لیکن فرانس کی برتری زیادہ دیر تک خطرے میں نہیں رہی۔ میچ کے 96 ویں منٹ میں ایمباپے نے لمبی دوری سے شاندار شاٹ لگا کر اپنا دوسرا اور ٹیم کا تیسرا گول داغ دیا۔ اس گول کے ساتھ ہی ایمباپے فرانس کے لیے کل وقتی سب سے زیادہ گول کرنے والے کھلاڑی بن گئے۔ ان کے نام اب بین الاقوامی فٹ بال میں 58 گول ہو گئے ہیں۔

ورلڈ کپ کی تاریخ میں بھی ایمباپے نے نیا مقام حاصل کیا۔ ان کے ورلڈ کپ گولوں کی تعداد 14 ہو گئی ہے اور اب وہ سب سے زیادہ گول کرنے والے کھلاڑی میروسلاو کلوزے (16 گول) سے صرف دو گول پیچھے ہیں۔ ایمباپے نے اس فہرست میں پیلے، لیونل میسی اور جسٹ فونٹین کو پیچھے چھوڑ دیا ہے۔ فرانس اب اپنے اگلے مقابلے میں عراق سے ٹکرائے گا، جبکہ اس کے بعد اس کا سامنا ایرلنگ ہالینڈ کی ٹیم ناروے سے ہوگا۔ وہیں سینیگال کو ناک آوٹ راونڈ کی امیدیں برقرار رکھنے کے لیے آنے والے میچوں میں بہتر کارکردگی کا مظاہرہ کرنا ہوگا۔

ہندوستھان سماچار

---------------

ہندوستان سماچار / انظر حسن