فیفا ورلڈ کپ 2026: میسی کی ہیٹرک سے ارجنٹینا کا شاندار آغاز، الجیریا کو 0-3 سے ہرایا

کینسس سٹی، 17 جون (ہ س)۔ اسٹار فٹ بالر لیونل میسی نے ایک اور تاریخی کامیابی اپنے نام کرتے ہوئے فیفا ورلڈ کپ 2026 کے پہلے مقابلے میں ہیٹرک لگائی اور ارجنٹینا کو الجیریا پر 0-3 سے شاندار جیت دلائی۔ 38 سالہ میسی نے میچ میں تین گول داغ کر نہ صرف ٹیم کو جیت دلائی، بلکہ ورلڈ کپ کی تاریخ میں سب سے زیادہ گول کرنے کے ریکارڈ کی برابری بھی کر لی۔ میسی اب ورلڈ کپ میں 16 گول کے ساتھ جرمنی کے سابق اسٹرائیکر میروسلاو کلوزے کے برابر پہنچ گئے ہیں۔

اس کے ساتھ ہی میسی ورلڈ کپ کی تاریخ میں پانچ علیحدہ ورلڈ کپ ایڈیشنز میں گول کرنے والے دوسرے کھلاڑی بن گئے۔ اس سے پہلے یہ کامیابی کرسٹیانو رونالڈو حاصل کر چکے ہیں۔ ارجنٹینا نے مقابلے کے آغاز سے ہی جارحانہ کھیل دکھایا اور میسی نے اپنی شاندار فارم برقرار رکھتے ہوئے الجیریا کی دفاعی لائن کو مسلسل پریشان کیا۔ ان کے تینوں گولوں نے اسٹیڈیم میں موجود شائقین کو مسحور کر دیا۔

میسی نے اس مقابلے کے ساتھ ایک اور ریکارڈ بنایا۔ وہ ورلڈ کپ میں ہیٹرک لگانے والے سب سے عمر رسیدہ کھلاڑی بن گئے اور اس معاملے میں انہوں نے کرسٹیانو رونالڈو کا ریکارڈ بھی پیچھے چھوڑ دیا۔ عالمی چیمپئن ارجنٹینا نے اس جیت کے ساتھ اپنی مہم کا جاندار آغاز کیا ہے اور ٹیم نے خطاب بچانے کی سمت میں مضبوط اشارے دیے ہیں۔ اب ارجنٹینا اپنے اگلے مقابلے میں اسی فارم کو برقرار رکھنے کی کوشش کرے گا، جبکہ الجیریا واپسی کی امید کے ساتھ اگلے میچ کی تیاری کرے گا۔

ہندوستھان سماچار

---------------

ہندوستان سماچار / انظر حسن