اینٹیگوا، 17 جون (ہ س)۔ ویسٹ انڈیز نے سری لنکا کے خلاف آئندہ دو میچوں کی گھریلو ٹیسٹ سیریز کے لیے اپنی ٹیم کا اعلان کر دیا ہے۔ تیز گیند باز الزاری جوزف اور شمر جوزف کی انجری کے بعد ٹیسٹ ٹیم میں واپسی ہوئی ہے۔ وکٹ کیپر بلے باز جوشووا ڈی سلوا اور عامر جنگو کو بھی واپس بلا یا گیا ہے۔

الزاری اور شمر گزشتہ سال ہندوستان اور نیوزی لینڈ کے دورے کے دوران انجری کے باعثٹیم سے باہر ہو گئے تھے۔ دونوں نے آخری بار 2025 میں آسٹریلیا کے خلاف ٹیسٹ میچ کھیلا تھا۔ ان کی واپسی سے ویسٹ انڈیز کے تیز گیندبازی اٹیک کو تقویت ملی، جس میں کیمار روچ اور جےڈن سیلز بھی شامل ہیں۔

جوشووا ڈی سلوا وکٹ کیپر کے کردار میں واپس آئے۔ وہ گھریلو کرکٹ میں متاثر کن رہے ہیں، حالیہ ویسٹ انڈیز چیمپئن شپ میں سات اننگز میں 413 رن بنا کر ٹورنامنٹ کے سب سے کامیاب بلے باز رہے ۔

گزشتہ دورے کے دوران وکٹ کیپنگ کرنے والے ٹیون املاچ کو مرکزی ٹیم میں شامل نہیں کیا گیا ہے۔ انہیں سری لنکا کے خلاف 18 سے 21 جون تک چار روزہ پریکٹس میچ کے لیے ویسٹ انڈیز سلیکٹ الیون کا کپتان مقرر کیا گیا ہے۔

بائیں ہاتھ کے بلے باز عامر جنگو کی بھی طویل غیر حاضری کے بعد ٹیسٹ ٹیم میں واپسی ہوئی۔ انہوں نے گھریلو سیزن کے دوران سات اننگ میں 411 رنز بنا کر سلیکٹرز کی توجہ حاصل کی۔

ہیڈ کوچ ڈیرن سیمی نے کہا کہ ہر ٹیسٹ سیریز ٹیم کے لیے اپنی شناخت مضبوط کرنے اور بہتری لانے کا موقع ہے۔ انہوں نے کہا کہ سری لنکا ایک مضبوط ٹیم ہے اور ویسٹ انڈیز کو اپنا بہترین مظاہرہ کرنا ہوگا۔

سیمی نے کہا کہ کھلاڑی 12 جون سے اینٹیگوا میں ایک اعلیٰ کارکردگی کے تربیتی کیمپ میں حصہ لے رہے ہیں، جس سے ٹیم کو اپنی تیاریوں کو بہتر کرنے کا موقع مل رہا ہے۔یہ سیریز ورلڈ ٹیسٹ چیمپئن شپ سائیکل کا حصہ ہے، جس میں ویسٹ انڈیز اس وقت نویں نمبر پر ہے۔ پہلا ٹیسٹ 25 سے 29 جون اور دوسرا 3 سے 7 جولائی تک نارتھ ساؤنڈ میں کھیلا جائے گا۔

ویسٹ انڈیز ٹیسٹ ٹیم :

روسٹن چیس (کپتان)، جومل واریکن (نائب کپتان)، جان کیمبل، ٹیگینارائن چندرپال، جوشووا ڈی سلوا (وکٹ کیپر)، جسٹن گریویز، کیویم ہوج، شائی ہوپ، عامر جنگو، الزاری جوزف، شمر جوزف، برینڈن کنگ، اینڈرسن فلپ، کیمرون فلپ اور کیمرون۔

ہندوستھان سماچار

ہندوستان سماچار / محمد شہزاد