جے ڈی اے نے جموں ریلوے اسٹیشن کے قریب غیر قانونی تجاوزات کو مسمار کیا

جموں، 17 جون (ہ س)۔ جموں ڈیولپمنٹ اتھارٹی (جے ڈی اے) نے جموں ریلوے اسٹیشن کے قریب تجاوزات کے خلاف بڑے پیمانے پر انہدامی کارروائی کرتے ہوئے 30 سے زائد غیر قانونی ڈھانچوں کو مسمار کر دیا اور تقریباً 10 کروڑ روپے مالیت کی سرکاری اراضی واگزار کرا لی۔ سرکاری حکام کے مطابق جے ڈی اے اور ضلع انتظامیہ کی مشترکہ ٹیموں نے بدھ کی صبح منگل مارکیٹ کے سامنے، ویشنو دی دھام کے عقب اور ریلوے اسٹیشن کے نزدیک واقع تقریباً نصف ایکڑ اراضی سے غیر قانونی قبضے ہٹا دیے۔ اس دوران غیر مجاز ڈھابوں، دکانوں اور دیگر تجارتی ڈھانچوں کو منہدم کیا گیا۔

حکام نے بتایا کہ مذکورہ اراضی کئی برسوں سے غیر قانونی قبضے میں تھی جہاں دو افراد کی جانب سے مختلف تجارتی سرگرمیاں چلائی جا رہی تھیں۔ قابضین نے قبضے کو قانونی شکل دینے کے لیے عدالت سے رجوع کیا تھا، تاہم متعلقہ اتھارٹی نے معاملے کا جائزہ لینے کے بعد قبضے کو غیر قانونی قرار دیتے ہوئے تجاوزات ہٹانے کے احکامات جاری کیے۔

حکام کے مطابق تجاوزات کی وجہ سے ریلوے اسٹیشن کے اطراف ٹریفک کی روانی متاثر ہو رہی تھی اور مسافروں، پیدل چلنے والوں اور عام شہریوں کو مشکلات کا سامنا کرنا پڑتا تھا۔ اس کے علاوہ علاقے میں بعض غیر قانونی سرگرمیوں اور غیر صحت بخش ماحول میں خوراک کی تیاری کی شکایات بھی موصول ہو رہی تھیں۔جے ڈی اے کے وائس چیئرمین روپیش کمار نے کہا کہ سرکاری زمین عوامی امانت ہے اور اسے غیر قانونی قبضوں سے محفوظ رکھنا انتظامیہ کی ذمہ داری ہے۔ انہوں نے کہا کہ شہری ترقی، عوامی مفاد اور بنیادی ڈھانچے کے تحفظ کے لیے تجاوزات کے خلاف کارروائیاں آئندہ بھی جاری رہیں گی۔

ہندوستھان سماچار

---------------

ہندوستان سماچار / محمد اصغر