نئی دہلی، 12 جون (ہ س)۔ریلوے کے وزیر اشونی وشنو نے جمعہ کو ریلوے ریکروٹمنٹ بورڈ (آر آر بی ) بھرتی کے عمل کی ایک اعلیٰ سطحی جائزہ میٹنگ کی اور بھرتی کے عمل کو زیادہ شفاف، درست اور ٹیکنالوجی پر مبنی بنانے پر زور دیا۔ انہوں نے کہا کہ ریلوے میں بھرتی کے نظام کو نئی ٹیکنالوجی، تیز تر عمل اور زیادہ احتساب کے ساتھ مسلسل بہتر کیا جانا چاہیے۔

میٹنگ میں بتایا گیا کہ ہندوستانی ریلوے نے مالی سال 2025-26 کے دوران چھ بڑے زمروں میں مختلف بھرتی سائیکلوں کے ذریعے 43,781 امیدواروں کو ملازمت دی ہے۔ یہ بھرتیاں 47,084 خالی آسامیوں کے لیے انتخابی عمل کےتحت کی گئیں۔ ان میں 18,799 اسسٹنٹ لوکو پائلٹس (اے ایل پی )، 14,298 ٹیکنیشن، 452 سب انسپکٹرز، 4,208 کانسٹیبل، 7,951 جونیئر انجینئرز/ڈی ایم ایس/سی ایم اے اور 1,376 پیرامیڈیکل پوسٹ شامل ہیں۔

وزیر ریلوے نے بتایا کہ سالانہ بھرتی کیلنڈر اور سہ ماہی خالی اسامیوں کے نوٹیفکیشن کو امیدواروں کی جانب سے مثبت فیڈ بیک ملا ہے۔ اس سے امیدواروں کو اپنی تیاری کی بہتر منصوبہ بندی کرنے میں مدد مل رہی ہے اور بھرتی کے عمل میں زیادہ وضاحت اور یقین پیدا ہو رہا ہے۔

انہوں نے محکمانہ امتحانات کو مکمل طور پر کمپیوٹر پر مبنی ٹیسٹ (سی بی ٹی) سسٹم میں تبدیل کرنے میں پیش رفت کا بھی جائزہ لیا۔ ویشنو نے ہدایت دی کہ بھرتی کے عمل کو زیادہ تیز، موثر اور امیدواروں کے موافق بنانے کے لیے جہاں بھی ممکن ہو ٹیبلٹ پر مبنی امتحانات کو بڑھایا جائے۔

اجلاس کو یہ بھی بتایا گیا کہ ریلوے میں بھرتی کے امتحانات ملک بھر کے مختلف شہروں میں متعدد مراکز پر منعقد کیے جاتے ہیں۔ امیدواروں کی بڑی تعداد کو ایڈجسٹ کرنے کے لیے، امتحانات متعدد شفٹوں اور 15 زبانوں میں منعقد کیے جاتے ہیں، جو تمام علاقوں کے امیدواروں کے لیے یکساں مواقع کو یقینی بناتے ہیں۔

وزیر ریلوے نے ریلوے ریکروٹمنٹ بورڈز کو امیدواروں اور دیگر شراکت داروں کے ساتھ رابطے کو مضبوط بنانے کی ہدایت دی ۔ انہوں نے کہا کہ بھرتی سے متعلق غلط معلومات کی فوری تردید کی جانی چاہیے تاکہ امیدواروں کو درست معلومات حاصل ہو سکیں اور بھرتی کے عمل میں ان کا اعتماد برقرار رہے۔

انہوں نے اس بات کا اعادہ کیا کہ ہندوستانی ریلوے منصفانہ، شفاف اور میرٹ پر مبنی بھرتی کے نظام کے لیے پابند عہد ہے اور ٹیکنالوجی، منظم منصوبہ بندی اور مسلسل اصلاحات کے ذریعے نوجوانوں کو بہتر مواقع فراہم کرنے کی کوشش جاری رکھے گا۔

ہندوستھان سماچار

ہندوستان سماچار / محمد شہزاد