شملہ، 12 جون (ہ س)۔ ہماچل پردیش میں گزشتہ رات سے موسم نے کروٹ بدل لی ہے۔ ریاست کے کئی حصوں میں تیز آندھی، گرج چمک کے ساتھ بارش اور آسمانی بجلی گرنے کے واقعات ریکارڈ کیے گئے ہیں۔ اس سے جہاں شدید گرمی سے راحت ملی ہے، وہیں بعض علاقوں میں معمولاتِ زندگی متاثر ہوئے اور بجلی کی فراہمی بھی درہم برہم رہی۔ محکمۂ موسمیات نے 16 جون تک ریاست کے مختلف حصوں میں بارش اور آندھی کا الرٹ جاری کیا ہے۔

گزشتہ رات شملہ، کانگڑا، بھونتر، سندر نگر، منالی اور کفری سمیت کئی مقامات پر آندھی اور آسمانی بجلی گرنے کے واقعات پیش آئے۔ جبکہ کمارسین اور ملانا کے علاقوں میں درمیانی درجے کی ژالہ باری بھی ریکارڈ کی گئی۔ ضلع ہمیرپور کے نیری علاقے میں 81 کلومیٹر فی گھنٹہ کی رفتار سے تیز ہوائیں چلیں۔ کئی مقامات پر درخت گرنے اور عارضی رکاوٹوں کے باعث عوامی زندگی متاثر ہوئی۔

ضلع شملہ کی رام پور سب ڈویژن کے جھاکڑی علاقے میں جیوری بازار کے قریب قومی شاہراہ این ایچ-05 پر تیز آندھی کے باعث ایک درخت اکھڑ کر گر گیا، جس سے کچھ وقت کے لیے شاہراہ بند ہو گئی۔ بعد ازاں قومی شاہراہ اتھارٹی نے سخت محنت کے بعد راستہ بحال کر دیا۔ اس واقعے میں دو گاڑیوں کو معمولی نقصان پہنچا، تاہم کوئی جانی نقصان نہیں ہوا۔

ریاست کے مختلف علاقوں میں شدید بارش بھی ریکارڈ کی گئی۔ ضلع سولن کے قصبے کسولی میں سب سے زیادہ 105.0 ملی میٹر بارش درج کی گئی۔ دھرم پور میں 86.6 ملی میٹر، دھولاکواں میں 43.5 ملی میٹر، پالَم پور میں 40.0 ملی میٹر، سولن میں 34.6 ملی میٹر، جوت اور سراہن میں 30-30 ملی میٹر جبکہ ناہن میں 26.7 ملی میٹر بارش ریکارڈ کی گئی۔

بارش اور آندھی کے باعث ریاست کے درجۂ حرارت میں نمایاں کمی آئی ہے۔ گزشتہ 24 گھنٹوں کے دوران اوسط کم سے کم درجۂ حرارت میں 2.4 ڈگری سیلسیس کی کمی درج کی گئی، جبکہ یہ معمول سے 1.6 ڈگری کم رہا۔ میدانی علاقوں میں گزشتہ روز زیادہ سے زیادہ درجۂ حرارت 44 ڈگری سیلسیس تک پہنچ گیا تھا، جس سے شدید گرمی کا اثر محسوس کیا جا رہا تھا۔

ریاست کے اہم شہروں میں کم سے کم درجۂ حرارت کچھ اس طرح ریکارڈ کیا گیا: کوکومسیری 5.6 ڈگری، کیلانگ 7.0 ڈگری، کلپا 8.6 ڈگری، کفری 8.9 ڈگری، تابو 9.6 ڈگری، شملہ 13.4 ڈگری، سراہن 13.5 ڈگری، منالی 13.6 ڈگری، پالَم پور 15.0 ڈگری، سیوباغ 15.4 ڈگری، جببرہٹی 15.6 ڈگری، سولن 16.0 ڈگری، ڈلہوزی 16.2 ڈگری، ناہن 16.5 ڈگری، بھونتر 17.3 ڈگری، چمبہ 17.8 ڈگری، دھرم شالہ 18.4 ڈگری، نیری 19.2 ڈگری، اونا 19.4 ڈگری، سندر نگر 19.5 ڈگری، منڈی 19.9 ڈگری، برتھیں 20.0 ڈگری، کانگڑا 20.0 ڈگری، بلاس پور 21.0 ڈگری، پاؤنٹا صاحب 23.0 ڈگری اور دیہرا گوپی پور 23.1 ڈگری سیلسیس رکارڈ کیا گیا۔

محکمۂ موسمیات کے مطابق آج اور 13 جون کو ریاست کے کئی علاقوں میں تیز ہواؤں اور آندھی کے ساتھ بارش کا امکان ہے۔ 14 سے 16 جون تک بعض مقامات پر گرج چمک کے ساتھ بارش کا سلسلہ جاری رہ سکتا ہے، جبکہ 17 اور 18 جون کو صرف چند مقامات پر ہلکی بارش کی پیش گوئی کی گئی ہے۔

محکمہ نے 16 جون تک ریاست کے بعض حصوں میں آندھی، بارش اور آسمانی بجلی چمکنے کا الرٹ جاری کیا ہے۔ ابتدائی دو دنوں کے دوران 40 سے 50 کلومیٹر فی گھنٹہ کی رفتار سے ہوائیں چلنے اور بعض مقامات پر 60 کلومیٹر فی گھنٹہ تک جھکڑ آنے کی وارننگ دی گئی ہے۔ ابتدائی مرحلے میں چند علاقوں میں ژالہ باری کا امکان بھی ظاہر کیا گیا ہے، جبکہ بعد کے دنوں میں الرٹ کی شدت کم ہو جائے گی۔

ہندوستھان سماچار

---------------

ہندوستان سماچار / عبدالواحد