نئی دہلی، 12 جون (ہ س)۔

مرکزی وزیر داخلہ اور کو آپریٹیو امت شاہ نے جمعہ کو امرناتھ یاترا کی سیکورٹی کی تیاریوں کا جائزہ لیتے ہوئے یاتریوں کی حفاظت اور یاترا کے ہموار انعقاد کے لئے جامع ہدایات جاری کیں۔ انہوں نے کہا کہ مودی حکومت امرناتھ یاترا پر یاتریوں کے لئے انتہائی حفاظت اور آرام دہ سفر کو یقینی بنانے کے لئے پوری طرح پرعزم ہے۔

یہاں ایک اعلیٰ سطحی جائزہ میٹنگ میں وزیر داخلہ شاہ نے ہدایت دی کہ مرکزی مسلح پولیس فورسز (سی اے پی ایف)، جموں و کشمیر پولیس اور دیگر سیکورٹی ایجنسیوں کی مربوط کوششوں کے ذریعے یاترا کے راستے پر ایک کثیر سطحی اور ناقابل تسخیر سیکورٹی گرڈ قائم کیا جائے۔ انہوں نے سیکورٹی کے نظام کو مزید مضبوط بنانے کے لیے ڈرون، سی سی ٹی وی نگرانی، نگرانی کے نظام اور دیگر جدید ٹیکنالوجی کے وسیع استعمال پر زور دیا۔

شاہ نے کہا کہ مختلف مرکزی فورسز اور جموں و کشمیر پولیس کے سینئر افسران یاترا کے دوران کیمپ کی جگہوں اور یاترا کے راستے پر انتظامات کی مسلسل نگرانی کریں۔ انہوں نے یہ بھی ہدایت کی کہ یاتریوں کی رجسٹریشن، رہائش، صحت خدمات، مواصلات اور ڈیزاسٹر مینجمنٹ سے متعلق تمام ضروری سہولیات کے لیے خاطر خواہ انتظامات کیے جائیں۔

اجلاس میں یاترا سے وابستہ مقامی لوگوں اور جانوروں کی رجسٹریشن پر بھی زور دیا گیا۔ متعلقہ افراد کو کیو آر کوڈ والے شناختی کارڈ جاری کرنے اور یاترا میں استعمال ہونے والے جانوروں کے ہیلتھ چیک اپ کے لیے خصوصی کیمپ لگانے کی ہدایات دی گئیں۔

وزیر داخلہ نے حکام کو موسم کی صورتحال اور پیشین گوئیوں کی بنیاد پر یاتریوں کی نقل و حرکت کے انتظامات کرنے کی ہدایت دی۔ انہوں نے یہ بھی کہا کہ یاترا کے راستے کے علاوہ جموں و کشمیر کے دیگر اہم سیاحتی مقامات پر سخت حفاظتی انتظامات کو یقینی بنایا جائے تاکہ یاتری اور سیاح محفوظ ماحول میں درشن اور سیاحت سے لطف اندوز ہو سکیں۔

قومی سلامتی کے مشیر (این ایس اے) اجیت ڈوبھال، جموں و کشمیر کے لیفٹیننٹ گورنر منوج سنہا، آرمی چیف، سی آر پی ایف کے ڈائریکٹر جنرل اور وزارت داخلہ، سیکورٹی ایجنسیوں اور انتظامیہ کے دیگر اعلیٰ حکام میٹنگ میں موجود تھے۔

قابل ذکر ہے کہ ہر سال منعقد ہونے والی امرناتھ یاترا میں ملک کے مختلف حصوں سے لاکھوں یاتری شرکت کرتے ہیں اور اس کے پیش نظر سیکورٹی کے وسیع انتظامات کیے جاتے ہیں۔

ہندوستھان سماچار

ہندوستان سماچار / عطاءاللہ