امپھال، 11 جون (ہ س)۔ منی پور میں چھ لاپتہ ناگا افراد کی لاشوں کی برآمدگی کے بعد کشیدگی بڑھ گئی ہے۔ مختلف تنظیموں، سماجی رہنماؤں اور سول سوسائٹی کے گروپوں نے اس واقعے کی شدید الفاظ میں مذمت کی ہے۔ دریں اثنا نائب وزیر اعلیٰ محترمہ نیمچا کپگن نے واقعہ کو سفاکانہ اور پرتشدد قرار دیا۔ اس کی شدید مذمت کرتے ہوئے، انہوں نے کہا کہ اس واقعے نے معاشرے کو شدید غم وغصہ پہنچایا ہے اور اس قتل نے لوگوں کے اجتماعی ضمیر پر گہرا اثر ڈالا ہے۔

قابل ذکر ہے کہ 10 جون کو مشتبہ عسکریت پسندوں نے 6 ناگا شہریوں کو قتل کرنے کے بعد ان کی لاشیں حوالے کی تھیں۔ مرنے والے ان افراد میں شامل تھے جنہیں 13 مئی 2026 کو لیلن وائفے سے یرغمال بنایا گیا تھا۔ اس سے قبل 9 جون کو عسکریت پسندوں نے 24 کوکی شہریوں کو اغوا کرنے کے بعد رہا کیا تھا۔ اس سے امید پیدا ہوئی تھی کہ ناگا شہریوں کو بھی بحفاظت رہا کر دیا جائے گا، لیکن ایسا نہیں ہوا۔ اس واقعہ کے بعد ریاست میں بڑے پیمانے پر غم و غصہ پایا جا رہا ہے۔

منی پور حکومت کی جانب سے گہرے صدمے اور غصے کا اظہار کرتے ہوئے نائب وزیر اعلیٰ نیمچا کپگن نے کہا کہ منی پور میں اس طرح کے مظالم کے لیے کوئی جگہ نہیں ہے۔ انہوں نے کہا کہ ایسی حرکتیں انسانیت اور باہمی احترام کی اقدار کے منافی ہیں۔

انہوں نے کہا، ان چھ بے گناہ ناگا افراد کا المناک قتل انتہائی تکلیف دہ ہے۔ یہ انسانیت، باہمی احترام اور ان اقدار کے بالکل خلاف ہے جن کی ہم سب قدر کرتے ہیں۔

اس تناظر میں نائب وزیر اعلیٰ نے تمام برادریوں سے اپیل کی کہ وہ تشدد سے گریز کریں اور ریاست میں امن اور ہم آہنگی کی بحالی کے لیے مل کر کام کریں۔ انہوں نے اس بات پر زور دیا کہ متوفی کے لیے حقیقی احترام کا اظہار مختلف برادریوں کے درمیان زیادہ افہام و تفہیم، ہمدردی اور مکالمے کے ماحول کو فروغ دے کر ہی کیا جا سکتا ہے۔ مفاہمت کی ضرورت پر زور دیتے ہوئے، کپگن نے کہا کہ لوگوں کو درپیش چیلنجوں کے باوجود، منی پور کو اتحاد اور امید کی سرزمین کے طور پر محفوظ رکھا جانا چاہیے۔

انہوں نے مہلوکین کے اہل خانہ سے اپنی گہری تعزیت کا اظہار کیا اور انہیں اس مشکل وقت میں ہمت اور تسلی دی۔ امن، تحمل اور مفاہمت کی اپیل کرتے ہوئے، انہوں نے عام لوگوں سے خوف، نفرت، اور بار بار ہونے والے تشدد سے پاک مستقبل کی تعمیر کے لیے کام کرنے پر زور دیا۔

ہندوستھان سماچار

---------------

ہندوستان سماچار / عبدالواحد