امپھال، 11 جون (ہ س)۔

قومی تحقیقاتی ایجنسی (این آئی اے) نے منی پور میں لاپتہ ہونے کے بعد مردہ پائے گئے چھ ناگا شہریوں کے قتل کی تحقیقات اپنے ہاتھ میں لے لی ہیں۔ ایجنسی نے حقیقت سے پردہ اٹھانے اورمقتولین کی شناخت کی تصدیق کے لیے ایک جامع فرانزک تحقیقات شروع کر دی ہیں۔

مرنے والوں کی شناخت پادری کینپیبو چاوانگ، مانو تھیومائی، فینرونگ ویبو تھیومائی، دلیپ تھیومائی، کالیوانگ بو ابونمائی اور چا فینریلونگ کے طور پر کی گئی ہے۔ سبھی کونساکھول ناگا گاو¿ں کے رہنے والے تھے۔ اطلاعات کے مطابق ان چھ افراد کو 13 مئی کو لیون وائفے کے علاقے سے اغوا کیا گیا تھا۔

تقریباً ایک ماہ کی تلاشی مہم کے بعد، اور 24 گھنٹے تک جاری رہنے والی مشترکہ تلاشی مہم کے بعد، منی پور پولیس، آسام رائفلز، اور سینٹرل ریزرو پولیس فورس (سی آر پی ایف) کے تقریباً 450 اہلکاروں کی ایک ٹیم نے کانگ پوکپی ضلع کے کھرم وائیفی گاو¿ں کے قریب ان کی لاشیں برآمد کیں۔

حکام کے مطابق لاشیں انتہائی بوسیدہ حالت میں ملی ہیں جس کی وجہ سے ان کی شناخت ناممکن ہے۔ اس کے بعد این آئی اے کی ایک خصوصی ٹیم امپھال ایسٹ میں جواہر لال نہرو انسٹی ٹیوٹ آف میڈیکل سائنسز (جے این آئی ایم ایس) کے مردہ خانے پہنچی۔ ایجنسی فی الحال شواہد اکٹھا کر رہی ہے اور ڈی این اے ٹیسٹنگ اور پوسٹ مارٹم کے تفصیلی معائنے کے ذریعے متوفی کی شناخت کی تصدیق کر رہی ہے۔

دریں اثنا، لاشوں کو جے این آئی ایم ایس لائے جانے کے بعد امپھال میں کشیدگی پھیل گئی۔ اہل خانہ، کمیونٹی کے افراد اور مقامی شہریوں کی بڑی تعداد ہسپتال کے احاطے کے باہر جمع تھی۔ غم اور غصے کی لہر کے درمیان، مظاہرین اور سیکورٹی فورسز کے درمیان جھڑپیں ہوئیں۔

سیکیورٹی فورسز نے صورتحال پر قابو پانے کے لیے آنسو گیس کے گولے داغے۔ اس واقعے میں متعدد عام شہری اور سیکیورٹی اہلکار زخمی ہونے کی اطلاعات ہیں۔

ہندوستھان سماچار

ہندوستان سماچار / عطاءاللہ