نئی دہلی، 10 جون (ہ س)۔ صدر جمہوریہ دروپدی مرمو، نائب صدرجمہوریہ سی پی رادھا کرشنن، لوک سبھا اسپیکر اوم برلا اور مرکزی وزراءنے وزیر اعظم نریندر مودی کو ملک کے منتخب وزیر اعظم کے طور پر مسلسل 4,399 دن کی طویل ترین مدت تک عہدے پر رہنے کے لیے مبارکباد اور نیک خواہشات پیش کی ہیں۔

صدر جمہوریہ دروپدی مرمو نے بدھ کو سوشل میڈیا پر اپنی مبارکباد اور نیک خواہشات کا اظہار کرتے ہوئے کہا کہ یہ کامیابی وزیر اعظم مودی کی قیادت میں ہم وطنوں کے بھرپور اعتماد اور حمایت کا ثبوت ہے۔ انہوں نے کہا کہ مودی حکومت کے دوران حکمرانی، معاشی استحکام اور سماجی تبدیلی کے میدان میں دور رس ترقی ہوئی ہے اور مختلف فلاحی اسکیموں کے ذریعے ترقی کے فوائد سماج کے آخری فرد تک پہنچانے کی کوشش کی گئی ہے۔ صدر جمہوریہ نے خاص طور پر پی ایم-جنمن اور دھرتی ابا جنجاتی گرام اتکرش ابھیان کا ذکر کیا اور انہیں قبائلی برادریوں کی بہتری کے لیے اہم اقدامات قرار دیا۔

نائب صدرجمہوریہ سی پی رادھا کرشنن نے اس کامیابی کو نہ صرف ایک طویل مدت کی بلکہ ہندوستان کے لیے ایک تبدیلی کے دور کی علامت قرار دیا۔ انہوں نے کہا کہ وزیر اعظم مودی کی قیادت میں، ہندوستان نے اقتصادی ترقی، بنیادی ڈھانچے، تکنیکی ترقی، سماجی خودانحصاری اور عالمی حیثیت میں قابل ذکر ترقی کی ہے۔ انہوں نے کہا کہ تاریخ ابراہم لنکن کو انسانی وقار کو آگے بڑھانے اور غلامی کے خاتمے کے لیے یاد رکھتی ہے۔ آج وزیر اعظم نریندر مودی کو جامع ترقی کے ذریعے 250 کروڑ سے زیادہ لوگوں کو انتہائی غربت سے نکالنے اور لاکھوں خاندانوں کو امید، موقع اور وقار بحال کرنے کے لیے یاد کیا جائے گا۔

نائب صدر جمہوریہ نے کہا کہ تاریخ کے ایک اہم لمحے میں، وزیر اعظم نے اپنی دور اندیش قیادت، انتھک خدمات اور 'نیشن فرسٹ' کے اصول کے تئیں پرعزم وابستگی کے ساتھ ہندوستان کی صلاحیتوں اور امنگوں میں نیا اعتماد پیدا کیا ہے اور وہ موجودہ ہندوستان کے ایک حقیقی آئیکن کے طور پر ابھرے ہیں۔ انہوں نے وکست بھارت2047کی طرف گامزن قوم کی طرف سے ان کی مسلسل خدمات کے لیے نیک تمناو¿ں کا اظہار کیا ۔

لوک سبھا کے اسپیکر اوم برلا نے کہا کہ وزیر اعظم مودی کی 4,399 دن کی مسلسل خدمات ہندوستانی جمہوریت اور عوامی اعتماد کی مضبوطی کی علامت ہے۔ انہوں نے کہا کہ اس دور میں آئینی اقدار، پارلیمانی جمہوریت اور جمہوری اداروں کو مزید تقویت ملی ہے۔

مرکزی وزیر داخلہ اور کوآپریٹو امت شاہ نے وزیر اعظم مودی کے 12 سالہ دور کو ہندوستان کے لیے عزت نفس، ثقافتی نشاة ثانیہ اور خود انحصاری کا دور قرار دیا۔ انہوں نے کہا کہ اس عرصے کے دوران نئی پارلیمنٹ کی تعمیر، نئے فوجداری قوانین کا نفاذ، نئی تعلیمی پالیسی، مادری زبانوں میں میڈیکل اور انجینئرنگ کی تعلیم کے لیے اقدامات، جموں و کشمیر سے آرٹیکل 370 کا خاتمہ، رام مندر کی تعمیر اور قومی سلامتی کو مضبوط بنانے جیسے کئی تاریخی اقدامات کیے گئے۔

مرکزی وزیر خزانہ نرملا سیتارمن نے انسٹاگرام پر لکھا کہ وزیر اعظم نریندر مودی نے ہندوستان کے سب سے طویل عرصے تک رہنے والے منتخب وزیر اعظم کے طور پر ایک نیا ریکارڈ بنایا ہے۔ انہوں نے کہا کہ گزشتہ 4399 دنوں میں وزیراعظم نے ملک کو درپیش کئی مشکل وقتوں میں فیصلہ کن اور مضبوط قیادت فراہم کی ہے۔ انہوں نے کہا کہ 'انتودیا' اور 'سب کا ساتھ، سب کا وکاس، سب کا وشواس، سب کا پریاس' کے جذبے کے ساتھ حکومت نے اس بات کو یقینی بنایا ہے کہ ترقی کے فوائد ملک کے آخری فرد تک پہنچیں۔ وزیر خزانہ نے کہا کہ وزیر اعظم کی قیادت میں نیشنل ڈیموکریٹک الائنس (این ڈی اے) حکومت نے کئی بڑی اور جرات مندانہ اصلاحات نافذ کیں، جس کی وجہ سے عوام نے مسلسل ان پر اعتماد کیا ہے۔

وزیر دفاع راج ناتھ سنگھ نے وزیر اعظم مودی کو مبارکباد دیتے ہوئے کہا کہ ان کا دور اقتدار نیشن فرسٹ کے جذبے سے متاثر سرشار قیادت کی مثال ہے۔ انہوں نے کہا کہ گزشتہ بارہ برسوں کے دوران ہندوستان نے ترقی، عالمی قیادت اور ثقافتی نشاة ثانیہ میں نمایاں کامیابیاں حاصل کی ہیں اور ملک اپنے ورثے پر فخر کرتے ہوئے اعتماد کے ساتھ آگے بڑھ رہا ہے۔

مرکزی وزیر گریراج سنگھ نے کہا، یہ تاریخی سنگ میل 4,399 دن کی بلاتعطل عوامی خدمت، قومی مفاد کے لیے لگن اور وکست بھارت کے لیے ایک عزم کی نشان دہی کرتا ہے۔ آج وزیر اعظم نریندر مودی ہندوستان کے سب سے طویل عرصے تک رہنے والے منتخب وزیر اعظم بن گئے ہیں۔ ان کی قیادت میں ڈیجیٹل انقلاب، جدید انفراسٹرکچر، عوامی فلاح و بہبود کی اسکیموں میں نئے باب لکھے گئے ہیں۔

اتر پردیش کے وزیر اعلیٰ یوگی آدتیہ ناتھ نے ، 145 کروڑ ہندوستانیوں کی خدمت، سلامتی اور خوشحالی کے لیے وقف اورہندوستان کی تاریخ میں سب سے طویل عرصے تک رہنے والے منتخب وزیر اعظم بننے پر وزیر اعظم نریندر مودی کو مبارکباد دی۔ انہوں نے کہا کہ تاریخ میں ایسے مواقع کم ہی آتے ہیں جب کوئی لیڈر نہ صرف حکومت کی بلکہ ایک دور کے شعور کی علامت بن جاتا ہے۔ یہ اعزاز اسی استقامت، قربانی، وژن اور حب الوطنی کو خراج تحسین ہے جس نے لاکھوں ہم وطنوں کو وکست بھارت کے خواب سے جوڑا ہے۔

چھتیس گڑھ کے وزیر اعلیٰ وشنو دیو سائی نے مسلسل ہم وطنوں کی خدمت، سلامتی اور خوشحالی کے لیے وقف وزیر اعظم مودی کو ان کی تاریخی کامیابی پر مبارکباد دیتے ہوئے کہا کہ یہ تاریخی کامیابی مضبوط عقیدہ، 140 کروڑ ہندوستانیوں کے احترام اور آپ کی دور اندیش قیادت کو ملنے والی بے مثال عوامی حمایت کا واضحثبوت ہے۔

قابل ذکر ہے کہ وزیر اعظم نریندر مودی 10 جون 2026 کو ہندوستان کے سب سے طویل عرصے تک جمہوری طور پر منتخب وزیر اعظم کے طور پر 12 سالہ تاریخی مدت مکمل کریں گے۔ انہوں نے ملک کے پہلے وزیر اعظم پنڈت جواہرلعل کے 4,398 دنوں کے ریکارڈ کو پیچھے چھوڑتے ہوئے مسلسل 4,399 دن خدمات انجام دیں۔

---------------

ہندوستان سماچار / عبدالسلام صدیقی