نئی دہلی، 10 جون (ہ س)۔ نیشنل ہیومن رائٹس کمیشن (این ایچ آر سی) نے گجرات کے سورت ضلع میں جیولری مینوفیکچرنگ یونٹ میں سیپٹک ٹینک کی صفائی کے دوران چار کارکنوں کی موت کا از خود نوٹس لیا ہے۔ کمیشن نے اس واقعہ کو انسانی حقوق کی ممکنہ خلاف ورزیوں سے منسلک سنگین معاملہ سمجھتے ہوئے گجرات کے چیف سکریٹری اور سورت پولیس کمشنر کو نوٹس جاری کرتے ہوئے دو ہفتوں کے اندر تفصیلی رپورٹ طلب کی ہے۔ این ایچ آر سی نے بدھ کو ایک بیان میں کہا کہ میڈیا رپورٹس کے مطابق 7 جون کو چار کارکن مقررہ حفاظتی معیارات پر عمل کیے بغیر اسے صاف کرنے کے لیے سیپٹک ٹینک میں داخل ہوئے تھے۔ اس دوران زہریلی گیس سے ان کی حالت بگڑ گئی۔ انہیں امدادی کارکنوں نے اسپتال پہنچایا جہاں ڈاکٹروں نے انہیں مردہ قرار دے دیا۔

کمیشن نے کہا کہ اگر میڈیا رپورٹس درست ہیں تو یہ انسانی حقوق کی سنگین خلاف ورزی ہے۔ اس لیے کمیشن نے گجرات انتظامیہ اور پولیس سے واقعے کے حالات، ذمہ داری کے تعین کے عمل اور تحقیقات کی موجودہ صورتحال کے بارے میں تفصیلی معلومات کی درخواست کی ہے۔ اپنے نوٹس میں، این ایچ آر سی نے یہ بھی درخواست کی کہ رپورٹ میں یہ معلومات شامل کی جائیں کہ آیا ہلاک ہونے والے کارکنوں کے اہل خانہ کو کوئی معاوضہ یا دیگر امداد فراہم کی گئی ہے۔

میڈیا رپورٹس کے مطابق جیولری مینوفیکچرنگ یونٹ میں جیولری کی صفائی کے عمل سے پیدا ہونے والے فضلے کو سیپٹک ٹینک میں جمع کیاجاتاتھا۔ حادثہ اس ٹینک کی صفائی کے دوران پیش آیا۔

---------------

ہندوستان سماچار / عبدالسلام صدیقی