نئی دہلی، 10 جون (ہ س)۔ کرناٹک کے وزیر اعلی ڈی کے شیوکمار اور تمل ناڈو کے وزیر اعلیٰ سی جوزف وجے نے بدھ کو یہاں کانگریس پارلیمانی پارٹی کی چیئرپرسن سونیا گاندھی اور لوک سبھا میں اپوزیشن کے لیڈر راہل گاندھی سے ملاقات کی۔ شیوکمار کی میٹنگ وزیر اعلیٰ کا عہدہ سنبھالنے کے فوراً بعد ہوئی، جب کہ جوزف وجے نیتی آیوگ کی میٹنگ میں شرکت کے لیے دہلی کا دورہ کر رہے ہیں۔

کرناٹک کے وزیر اعلیٰ ڈی کے شیوکمار نے کانگریس قیادت سے ملاقات کے لیے 10 جن پتھ کا دورہ کیا اور وزیر اعلیٰ کا قلمدان سونپے جانے پر اظہار تشکر کیا۔ شیوکمار نے 3 جون کو کرناٹک کے وزیر اعلی کے طور پر حلف لیا تھا۔

میٹنگ کے بعد شیوکمار نے کانگریس ہیڈکوارٹر اور انڈین یوتھ کانگریس اور نیشنل اسٹوڈنٹس یونین آف انڈیا (این ایس یو آئی) کے دفاتر کا بھی دورہ کیا۔ انہوں نے کہا کہ ان کا سیاسی سفر این ایس یو آئی اور یوتھ کانگریس سے شروع ہوا اور وہ ان تنظیموں کو مندر کے مترادف سمجھتے ہیں۔

تمل ناڈو کے وزیر اعلیٰ سی جوزف وجے نے بھی سونیا گاندھی اور راہل گاندھی سے ملاقات کی۔ وہ نیتی آیوگ گورننگ کونسل کی میٹنگ میں شرکت کے لیے دہلی کے تین روزہ دورے پر ہیں۔ اپنے دورے کے دوران انہوں نے نائب صدر جمہوریہ سے بھی ملاقات کی۔

نیتی آیوگ کی میٹنگ کی صدارت وزیر اعظم نریندر مودی کریں گے۔ مختلف ریاستوں کے وزرائے اعلیٰ اور مرکز کے زیر انتظام علاقوں کے منتظمین میٹنگ کے دوران ترقی سے متعلق امور پر تبادلہ خیال کریں گے۔

ہندوستھان سماچار

---------------

ہندوستان سماچار / عبدالواحد