سرینگر یکم جون( ہ س)۔

وادی کشمیر میں ندی نالوں میں پانی سطح بڑھنے کے ساتھ ہی پچھلے کئ دنوں سے پانی میں ڈوبنے کے واقعات کا سلسلہ جاری ہے جس کے دوران کئ لوگوں کی ڈوبنے سے موت واقع ہوئی ہے۔ بڑھتی ہوئی ہوئے اموات کے سلسلے کو مدنظر رکھتے ہوئے گاندربل پولیس نے ایک عوامی ایڈوائزری جاری کی ہے جس میں رہائشیوں، سیاحوں سے نالہ سندھ سے دور رہنے کی اپیل کی گئی ہے کیونکہ پانی کی سطح میں تیزی سے اضافہ کے باعث حادثات کا خطرہ بڑھ گیا ہے۔ حکام نے کہا کہ تیزی سے بہنے والا پانی عوامی تحفظ کے لیے سنگین خطرہ ہے، خاص طور پر دریا کے کناروں کے ساتھ حساس مقامات پر۔ لوگوں کو مشورہ دیا گیا ہے کہ وہ نالے کے قریب نہ جائیں اور نہ ہی پانی کے قریب تفریحی سرگرمیوں میں مشغول ہوں۔ حفاظتی مہم کے ایک حصے کے طور پر، اسٹیشن ہاوس آفیسر گاندربل سجاد اسد نے نالہ سندھ کے ساتھ کئی مقامات پر حفاظتی اور آگاہی کے بینرز لگائے ہیں اور لاوڈ اسپیکر کے ذریعے اعلان کیا ہے تاکہ عوام کو بہنے والے نالے سے لاحق خطرات سے آگاہ کیا جا سکے۔ اس کے علاوہ حساس مقامات پر پولیس اہلکاروں کو تعینات کیا گیا ہے تاکہ صورتحال پر نظر رکھی جا سکے اور خطرناک رویے کو روکا جا سکے۔ ایڈوائزری میں والدین پر زور دیا گیا کہ وہ اس بات کو یقینی خبنائیں کہ بچے دریا کے کناروں کے قریب نہ کھیلیں، جہاں تیز دھارے خطرناک ثابت ہوسکتے ہیں۔ گاندربل پولیس نے عوام سے اپیل کی کہ وہ حفاظتی ہدایات پر سختی سے عمل کریں اور کسی بھی ناخوشگوار واقعے سے بچنے کے لیے حکام کے ساتھ تعاون کریں۔ انہوں نے مقامی باشندوں سے یہ بھی مطالبہ کیا کہ وہ پانی کی بڑھتی ہوئی سطح سے منسلک خطرات کے بارے میں آگاہی پھیلانے اور واٹر باڈی کے قریب انتہائی احتیاط برتیں۔

ہندوستھان سماچار

ہندوستان سماچار / Aftab Ahmad Mir