نئی دہلی، یکم جون (ہ س)۔ بھارتی ٹیکنالوجی ادارہ (آئی آئی ٹی) روڑکی نے آج مشترکہ داخلہ امتحان (جے ای ای) ایڈوانسڈ-2026 کا نتیجہ جاری کر دیا۔ اس سال امتحان میں دہلی زون کے شُبھم کمار نے 360 میں سے 330 نمبر حاصل کر کے پہلی پوزیشن حاصل کی۔ دوسرے نمبر پر دہلی زون کے کبیر چھِلّر رہے جنہوں نے 329 نمبر حاصل کیے، جبکہ جتِن چاہر 319 نمبروں کے ساتھ تیسرے نمبر پر رہے۔ اس طرح ٹاپ تینوں پوزیشن پر دہلی زون کے امیدواروں کا قبضہ رہا۔
آئی آئی ٹی روڑکی نے نتائج مقررہ وقت سے پہلے جاری کرتے ہوئے حتمی جوابی کلید بھی شائع کر دی۔ امیدوار اپنا نتیجہ سرکاری ویب سائٹ پر رول نمبر، تاریخِ پیدائش اور رجسٹرڈ موبائل نمبر کی مدد سے دیکھ سکتے ہیں۔
اس سال جے ای ای ایڈوانسڈ کے لیے 1,87,389 امیدواروں نے رجسٹریشن کرائی۔ ان میں سے 1,79,694 امیدوار امتحان میں شریک ہوئے اور 56,880 امیدواروں کو کامیاب قرار دیا گیا۔ کامیاب امیدوار اب بھارتی آئی آئی ٹیز میں داخلے کے لیے مشترکہ سیٹ الاٹمنٹ عمل (جوسا) کی کاؤنسلنگ میں حصہ لے سکیں گے۔ کامیاب امیدواروں میں 10,107 طالبات بھی شامل ہیں۔
اس بار جنرل زمرے کی کٹ آف 92 نمبر رہی، جو پچھلے سال کے مقابلے میں 18 نمبر زیادہ ہے۔ مضمون وار کٹ آف 8 نمبر مقرر کی گئی۔ تقریباً 31.65 فیصد امیدوار کامیاب قرار دیے گئے ہیں، جو پچھلے برسوں کے مقابلے میں بہتر کارکردگی سمجھی جا رہی ہے۔
زون کی بنیاد پر بھی کئی طلبہ نے شاندار کارکردگی دکھائی۔ آئی آئی ٹی دہلی زون سے شُبھم کمار نے پہلی پوزیشن حاصل کی۔ آئی آئی ٹی مدراس زون سے موہت شیکھر شکلا چوتھے نمبر پر رہے۔ آئی آئی ٹی ممبئی زون کے بی جے کرشن شری نواس نے چھٹی پوزیشن حاصل کی۔ آئی آئی ٹی روڑکی زون کے نکُنج اگروال 11ویں، آئی آئی ٹی کانپور زون کے رِدھیش اننت بینڈالے 18ویں اور آئی آئی ٹی بھونیشور زون کے بھاویش پاترا 29ویں نمبر پر رہے۔ آئی آئی ٹی گواہاٹی زون کے یشراج سنگھ نے 122ویں رینک حاصل کی۔
خواتین امیدواروں میں آئی آئی ٹی دہلی زون کی آروہی دیش پانڈے نمایاں رہیں۔ انہوں نے 360 میں سے 280 نمبر حاصل کر کے آل انڈیا رینک لسٹ میں 77واں مقام حاصل کیا۔ قابل ذکر ہے کہ جے ای ای ایڈوانسڈ ملک کے 23 بھارتی آئی آئی ٹیز میں انڈرگریجویٹ کورسز میں داخلے کی بنیاد ہے۔ نتیجہ جاری ہونے کے ساتھ ہی اب کامیاب امیدواروں کے لیے سیٹ الاٹمنٹ اور داخلہ کا سلسلہ شروع ہو گیا ہے۔
ہندوستھان سماچار
---------------
ہندوستان سماچار / عبدالواحد
