نئی دہلی، یکم جون (ہ س) — برکس ممالک کے 13 ویں شہری ترقیاتی فورم کا اجلاس 11 اور 12 جون کو نئی دہلی میں منعقد ہوگا۔ مرکزی وزیر برائے رہائش و شہری امور منوہر لال کھٹر نے پیر کے روز اس کا اعلان کیا۔ یہ تقریب اس سال بھارت میں ہونے والے برکس اجلاس کے تحت ایک اہم وزارتی پروگرام ہے، جسے وزیرِ اعظم نریندر مودی کے ’’انسانیت سب سے مقدم‘‘ کے وژن کے مطابق منعقد کیا جائے گا۔ اس اہم پروگرام کا مرکزی موضوع ’’لچک، جدت، باہمی تعاون اور پائیداری کے لیے تعمیر‘‘ ہوگا۔

منوہر لال کھٹر نے نئی دہلی میں سنکلپ بھون میں صحافیوں سے گفتگو کرتے ہوئے کہا کہ اس مرتبہ فورم کا موضوع ’’لوگوں کے لیے شہر: جامع اور لچکدار شہری مستقبل کے لیے برکس تعاون‘‘ رکھا گیا ہے۔ یہ موضوع بھارت کی اس سوچ کی ترجمانی کرتا ہے جس کے مطابق شہری منصوبہ بندی، نظم و نسق اور ترقی کے عمل میں عوام کو مرکزیت حاصل ہونی چاہیے۔

انہوں نے کہا کہ برکس ممالک میں تیزی سے شہری آبادی میں اضافہ ہو رہا ہے اور تمام ممالک کو رہائش، آمدورفت، موسمیاتی خطرات، بلدیاتی اداروں کی استعداد، شہری مالیات اور عوامی خدمات کی فراہمی جیسے مشترکہ چیلنجوں کا سامنا ہے۔ اس بار فورم میں جامع شہری ترقی، آفات سے محفوظ بنیادی ڈھانچے، مضبوط بلدیاتی اداروں اور ڈیجیٹل جدت جیسے اہم موضوعات پر غور و خوض کیا جائے گا۔

وزیر نے کہا کہ اس پلیٹ فارم کے ذریعے مشترکہ پالیسی حل سامنے آئیں گے اور برکس ممالک کے درمیان تعاون مزید مضبوط ہوگا، تاکہ شہر حقیقی معنوں میں عوام کی ضروریات کے مطابق بن سکیں۔ انہوں نے مزید کہا کہ بھارت اس موقع پر برکس خاندان کے تمام رکن ممالک کا خیرمقدم کرے گا اور مل کر ایسے شہروں کی تعمیر کے لیے کام کرے گا جو شہریوں کے لیے محفوظ، جامع اور دیرپا ہوں۔

دو روزہ پروگرام میں برکس رکن ممالک کے وزراء، اعلیٰ سرکاری حکام، پالیسی ساز اور ماہرین شرکت کریں گے۔ پہلے دن افتتاحی اجلاس اور مشترکہ ترجیحات پر اعلیٰ سطحی نشست منعقد ہوگی۔ اس کے ساتھ نمائندوں کو نئی دہلی میں شہری ترقی اور تبدیلی کے مختلف منصوبوں اور مقامات کا دورہ بھی کرایا جائے گا۔

دوسرے دن موضوعاتی مباحثے اور دوطرفہ ملاقاتیں ہوں گی، جن میں رکن ممالک اپنے تجربات اور کامیاب حکمتِ عملیوں کا تبادلہ کریں گے۔

یہ بات قابلِ ذکر ہے کہ بھارت نے پہلی مرتبہ 2013 میں نئی دہلی میں برکس شہری ترقیاتی فورم کی میزبانی کی تھی۔ اس کے بعد 2016 میں وشاکھاپٹنم اور 2021 میں آن لائن ذرائع کے ذریعے بھی اس فورم کی میزبانی کی گئی۔ اس سال بھارت چوتھی بار اس اہم فورم کا انعقاد کر رہا ہے۔

فورم کے قیام کے بعد سے یہ برکس ممالک کے درمیان شہری پالیسیوں کے تجربات کے تبادلے، مشترکہ ترجیحات کی نشاندہی اور برکس کے وسیع تر عمل میں شہری شعبے سے متعلق تجاویز اور آراء فراہم کرنے کا ایک اہم پلیٹ فارم رہا ہے۔

ہندوستھان سماچار

---------------

ہندوستان سماچار / عبدالواحد