رتناگیری، یکم جون (ہ س) رتناگیری ضلع میں دیورکھ-رتناگیری شاہراہ پر نیوے بودرک کے قریب پیر کی صبح تقریباً 6 بجے ایک المناک سڑک حادثہ پیش آیا، جس میں ایک شخص ہلاک جبکہ چار دیگر افراد زخمی ہو گئے۔ زخمیوں میں بعض کی حالت تشویشناک بتائی جا رہی ہے۔

ابتدائی اطلاعات کے مطابق سنگمیشور تعلقہ کے سائلے گاؤں میں ایک پروگرام مکمل کرنے کے بعد فنکاروں کا ایک گروپ سفید رنگ کی ویگن آر کار (ایم ایچ-02-جے پی-9493) میں سوار ہو کر نیولی کی جانب جا رہا تھا۔ جب گاڑی نیوے بودرک علاقے میں پہنچی تو ڈرائیور کا گاڑی پر قابو چھوٹ گیا اور کار سڑک کنارے کھڑے ڈمپر (ایم ایچ-08-جی-1559) سے پیچھے کی جانب سے انتہائی تیز رفتاری کے ساتھ ٹکرا گئی۔

حادثے کی شدت اس قدر زیادہ تھی کہ کار کا اگلا حصہ مکمل طور پر تباہ ہو گیا۔ زور دار آواز سن کر مقامی شہری سچن وبھوتے، راجو تامھنکر، اُمیش تامھنکر اور سنتوش سانڈیم فوری طور پر جائے حادثہ پر پہنچے۔ انہوں نے کار اور ڈمپر کے نیچے پھنسے زخمیوں کو باہر نکالنے میں اہم کردار ادا کیا۔ واقعے کی اطلاع ملتے ہی بھگوان مہادیو سامبرے ایمبولینس سروس کے ڈرائیور منوج پانچال موقع پر پہنچے اور تمام زخمیوں کو فوری طور پر قریبی دیہی اسپتال منتقل کیا، جہاں ان کا علاج جاری ہے۔

حادثے میں جاں بحق ہونے والے فنکار کی شناخت تاحال نہیں ہو سکی ہے۔ اسپتال ذرائع کے مطابق دیگر زخمیوں کی حالت تشویشناک ہے اور انہیں طبی نگرانی میں رکھا گیا ہے۔ دیورکھ پولیس نے واقعے کا اندراج کر کے حادثے کی وجوہات جاننے کے لیے مزید تحقیقات شروع کر دی ہیں۔

ہندوستھان سماچار

--------------------

ہندوستان سماچار / جاوید این اے