تین سالہ بیٹا بھی اس کے ساتھ گر پڑا۔ واقعہ سی سی ٹی وی میں قید

اٹارسی، یکم جون (ہ س) ۔مدھیہ پردیش کے مصروف ترین ریلوے جنکشنوں میں سے ایک اٹارسی ریلوے اسٹیشن پر پیر کی صبح ایک المناک حادثہ پیش آیا۔ ایک خاتون اپنے تین سالہ بیٹے کے ساتھ چلتی ٹرین میں چڑھنے کی کوشش کے دوران ٹرین اور پلیٹ فارم کے درمیان گر گئی۔ خاتون کی ٹانگیں کٹ گئیں جبکہ بچے کو معمولی چوٹیں آئیں۔ یہ سارا واقعہ سٹیشن پر نصب سی سی ٹی وی کیمروں میں قید ہو گیا۔

اس واقعہ سے پلیٹ فارم پر افراتفری مچ گئی۔ مسافروں، ریلوے ملازمین اور ریلوے پروٹیکشن فورس (آر پی ایف) کی فوری کارروائی کی بدولت خاتون اور بچے کو فوری طور پر پٹریوں سے ہٹا کر اسپتال پہنچایا گیا۔ اطلاعات کے مطابق جبل پور ضلع کے بل پورہ مڈائی گاو¿ں کی رہنے والی 25 سالہ انجلی کشیپ اپنے تین سالہ بیٹے کے ساتھ ٹرین نمبر 22187 رانی کملا پتی-ادھارتال انٹرسٹی سپرفاسٹ ایکسپریس میں سفر کررہی تھی۔ ٹرین پیر کی صبح اٹارسی ریلوے اسٹیشن کے پلیٹ فارم نمبر 4 پر پہنچی۔ جیسے ہی ٹرین روانہ ہو رہی تھی، خاتون نے اپنے بچے کے ساتھ کوچ میں سوار ہونے کی کوشش کی۔ اپنا توازن کھونے سے وہ اور بچہ پلیٹ فارم اور ٹرین کے درمیان گر گئے۔ یہ واقعہ اس قدر اچانک پیش آیا کہ آس پاس کے مسافر چند لمحوں کے لیے ہکا بکا رہ گئے۔

حادثے کو دیکھ کر پلیٹ فارم پر موجود مسافروں نے فوری طور پر الارم چین پلنگ (اے سی پی) کے ذریعے ٹرین کو روک دیا۔ ریلوے پروٹیکشن فورس اور اسٹیشن انتظامیہ کو بھی آگاہ کیا گیا۔ آر پی ایف کے اے ایس آئی وکرم سنگھ، جسونت سنگھ، راجیش کمار، اور نواب سنگھ سمیت ریلوے اہلکار جائے وقوعہ پر پہنچے۔ ریلوے عملے اور صفائی ملازمین کی مدد سے خاتون اور بچے کو بحفاظت باہر نکال لیا گیا۔ عینی شاہدین کے مطابق اگر مسافر بروقت کارروائی نہ کرتے تو حادثہ اور بھی سنگین ہو سکتا تھا۔

تشویشناک حالت میں اسپتال منتقل

خاتون کی انتہائی تشویشناک حالت کی وجہ سے ریلوے اہلکاروں نے ایمبولینس کا انتظار نہیں کیا اور فوری طور پر اسے سرکاری اسپتال لے جانے کے لیے نجی آٹو کا انتظام کیا۔ ڈاکٹروں کے مطابق خاتون کی ایک ٹانگ ران کے قریب اور دوسری ٹانگ پیر کے قریب کٹی ہوئی تھی۔ بچے کی کمر پر معمولی چوٹیں آئی ہیں اور اس کی حالت خطرے سے باہر بتائی جارہی ہے۔ دونوں زیر علاج ہیں۔

آدھے گھنٹے تک ریل آپریشن متاثر رہا۔

ریلوے حکام کے مطابق رانی کملا پتی-ادھارتال انٹرسٹی سپرفاسٹ ایکسپریس صبح 6بج کر33 بجمنٹ پر اٹارسی اسٹیشن پہنچی۔ حادثے کے بعد ٹرین کو ریسکیو اور ریلیف آپریشن کے لیے کچھ دیر کے لیے روک دیا گیا۔ ضروری طریقہ کار مکمل ہونے کے بعد، ٹرین صبح 7بج کر09 منٹ پر اپنی منزل کے لیے روانہ ہوئی۔ اس واقعہ سے پلیٹ فارم پر مسافروں کی ہلچل اور بھیڑ بھڑک اٹھی۔

یہ سارا واقعہ سی سی ٹی وی میں قید ہوگیا۔

اسٹیشن پر نصب سی سی ٹی وی کیمروں نے یہ سارا واقعہ ریکارڈ کر لیا۔ فوٹیج میں دکھایا گیا ہے کہ خاتون اور اس کا بچہ تیزی سے ٹرین کی طرف بڑھ رہے ہیں اور اس میں سوار ہونے کی کوشش کر رہے ہیں۔ وہ اپنا توازن کھو بیٹھتے ہیں اور دونوں گر جاتے ہیں۔ ریلوے حکام نے فوٹیج کو تحقیقات کے لیے محفوظ کر لیا ہے۔

ریلوے نے حفاظتی اپیل جاری کردی

اس واقعے کے بعد ریلوے انتظامیہ نے مسافروں سے اپیل کی ہے کہ وہ چلتی ٹرین سے کبھی بھی چڑھنے یا اترنے کی کوشش نہ کریں۔ چند سیکنڈ کی جلد بازی کسی سنگین حادثے کا باعث بن سکتی ہے۔ ریلوے حکام نے بتایا کہ اگر کوئی ٹرین چھوٹ جاتی ہے تو اگلی ٹرین کا انتظار کرنا ایک محفوظ آپشن ہے۔ مسافروں کی حفاظت اولین ترجیح ہے، اور صرف حفاظتی اصولوں کی پابندی ہی ایسے حادثات کو روک سکتی ہے۔

---------------

ہندوستان سماچار / عبدالسلام صدیقی