ٹریفک پولیس جموں نے اسٹنٹ باز کی گاڑی کو ضبط کیا

جموں، 07 مئی (ہ س)۔ جموں شہر کے مُٹھی فلائی اوور پر کار سے خطرناک اسٹنٹ کرنا ایک نوجوان کو مہنگا پڑ گیا۔ سوشل میڈیا پر ویڈیو وائرل ہوتے ہی ٹریفک پولیس حرکت میں آ گئی اور متعلقہ گاڑی کو ضبط کر لیا، جبکہ گاڑی چلانے والے ایم بی اے طالب علم کی کونسلنگ کرکے اسے سخت وارننگ دے کر چھوڑ دیا گیا۔

بدھ کی صبح سوشل میڈیا پر ایک ویڈیو تیزی سے وائرل ہوئی جس میں ایک نوجوان مُٹھی فلائی اوور پر لاپرواہی سے گاڑی چلاتے اور خطرناک اسٹنٹ کرتے نظر آ رہا تھا۔ ویڈیو سامنے آنے کے بعد ٹریفک پولیس نے فوری کارروائی کرتے ہوئے گاڑی کے نمبر کی بنیاد پر اس کی شناخت کی۔تحقیقات کے دوران معلوم ہوا کہ کار آرو شرما نامی نوجوان چلا رہا تھا جو ایم بی اے کا طالب علم ہے۔ ڈی ایس پی ٹریفک سٹی اشونی شرما نے بتایا کہ ویڈیو میں نوجوان کی لاپرواہی صاف دکھائی دے رہی تھی اور اس قسم کی اسٹنٹ بازی نہ صرف ڈرائیور بلکہ سڑک پر چلنے والے دیگر افراد کی جان کے لیے بھی خطرہ بن سکتی ہے۔

انہوں نے کہا کہ گاڑی کا نمبر ملتے ہی پولیس نے قانونی کارروائی کرتے ہوئے کار کو ضبط کر لیا۔ دوسری جانب گاڑی کے مالک نے پولیس کو بتایا کہ وہ کٹرا گئے ہوئے تھے اور ان کی غیر موجودگی میں گاڑی ان کے بیٹے کے پاس تھی۔ ادھر نوجوان نے پولیس کے سامنے دعویٰ کیا کہ وائرل ویڈیو تقریباً دو سال پرانی ہے اور ویڈیو میں اسٹنٹ کرنے والا نوجوان اب بیرونِ ملک جا چکا ہے۔ تاہم پولیس نے معاملے کو سنجیدگی سے لیتے ہوئے نوجوان کی کونسلنگ کی اور آئندہ ایسی حرکت نہ کرنے کی سخت ہدایت دی۔

شہریوں نے ٹریفک پولیس کی اس کارروائی کو سراہتے ہوئے کہا کہ سوشل میڈیا پر اس طرح کی ویڈیوز دیگر نوجوانوں کو بھی خطرناک اسٹنٹ کرنے کی ترغیب دیتی ہیں، اس لیے ایسے معاملات میں سخت کارروائی ضروری ہے۔

ہندوستھان سماچار

---------------

ہندوستان سماچار / محمد اصغر