جموں, 07 مئی (ہ س)۔

سالانہ امرناتھ یاترا کی تیاریوں کو لے کر انتظامیہ نے کام میں تیزی لا دی ہے۔ بالتل راستے پر برف ہٹانے اور مرمت کے کام ترجیحی بنیادوں پر جاری ہیں تاکہ یاترا کے دوران عقیدت مندوں کو کسی قسم کی پریشانی کا سامنا نہ کرنا پڑے۔

ذرائع کے مطابق یاترا کے راستوں کو محفوظ اور ہموار بنانے کے لیے متعلقہ ایجنسیوں کو تعینات کر دیا گیا ہے جبکہ حساس علاقوں میں خصوصی نگرانی رکھی جا رہی ہے۔انتظامیہ کی جانب سے یاترا کے رجسٹریشن عمل کو بھی آخری شکل دی جا رہی ہے۔ اس کے علاوہ یاتریوں کی حفاظت کے پیش نظر سیکورٹی انتظامات اور طبی سہولیات کو مزید مضبوط بنایا جا رہا ہے۔ حکام کا کہنا ہے کہ یاترا کے دوران میڈیکل کیمپ، ایمبولینس اور ایمرجنسی خدمات کی مناسب دستیابی یقینی بنائی جائے گی۔حکام کے مطابق تمام تیاریوں کو مقررہ وقت کے اندر مکمل کرنے کا ہدف رکھا گیا ہے تاکہ شری امرناتھ یاترا 2026 کو پُرامن اور محفوظ ماحول میں کامیابی کے ساتھ منعقد کیا جا سکے۔

ہندوستھان سماچار

---------------

ہندوستان سماچار / محمد اصغر